గాలి కేసు: ఐఎఎస్ అధికారి శ్రీలక్ష్మి కోసం సిబిఐ గాలింపు

హైదరాబాద్: కర్ణాటక మాజీ మంత్రి గాలి జనార్దన్ రెడ్డి గనుల అక్రమ తవ్వకాల కేసులో సిబిఐ అధికారులు గనుల శాఖ మాజీ కార్యదర్శి శ్రీలక్ష్మి కోసం ముమ్మరంగా గాలిస్తున్నారు. ఆమె ఢిల్లీలో ఉండవచ్చుననే అనుమానాలు వ్యక్తమవుతున్నాయి. తనకు సన్నిహితంగా ఉండే ఓ మంత్రి ద్వారా, ఇతర ప్రముఖుల ద్వారా అరెస్టు కాకుండా చూసుకోవడానికి ఆమె ప్రయత్నాలు సాగిస్తున్నట్లు చెబుతున్నారు. గనుల సంస్థ మాజీ డైరెక్టర్ రాజగోపాల్‌ను సిబిఐ అరెస్టు చేసిన నేపథ్యంలో శ్రీలక్ష్మి అరెస్టుకు కూడా రంగం సిద్ధమైనట్లు వార్తలు వచ్చాయి. దీంతో ఆమె ఉద్యోగానికి సెలవు పెట్టారు. ఈ నెల 9 నుచి మూడు రోజుల పాటు ఆమె సెలవు పెట్టారు. ఆ తర్వాత రెండో శనివారం, ఆదివారం వచ్చాయి. ఆమె సోమవారం విధులకు హాజరు కావాల్సి ఉంది. అయితే ఆమె సెలవును పొడగించారు. అనారోగ్యం పేరుతో ఆమె సెలవు పెట్టారు.

సెలవు పెట్టి ఆమె చెన్నైలోని తన సోదరి వద్దకు వెళ్లి ఉంటుందని సిబిఐ అధికారులు అనుమానించారు. దాంతో ఆమె కోసం సిబిఐ బృందం ఒకటి చెన్నైకి వెళ్లినట్లు తెలుస్తోంది. వచ్చే నెల 4వ తేదీ లోపు గాలి జనార్దన్ రెడ్డి కేసులో సిబిఐ చార్జిషీట్ దాఖలు చేయాల్సి ఉంది. దీంతో శ్రీలక్ష్మిని అరెస్టు చేయడానికి సిబిఐ అధికారులు ప్రయత్నిస్తున్నారని వార్తలు వస్తున్నాయి. అప్పట్లో గాలి జనార్దన్ రెడ్డికి మేలు జరిగే విధంగా అప్పట్లో శ్రీలక్ష్మి ఇష్టారీతిలో జీవోలు జారీ చేసినట్లు ఆరోపణలు వచ్చాయి.

English summary

It is said that CBI is searching for IAS officer Srilaxmi in Gali Janardhan Reddy case.