గాలి ఆస్తుల విలువ రూ. 1500 కోట్లు, గుర్తించిన సిబిఐ

హైదరాబాద్: కర్ణాటక మాజీ మంత్రి గాలి జనార్డన్ రెడ్డికి చెందిన రూ.1500 కోట్ల విలువైన 78 ఆస్తులను సిబిఐ గుర్తించినట్లు సమాచారం. ఈ మేరకు మీడియాలో వార్తలు వచ్చాయి. ఇవన్నీ దేశంలోని ప్రముఖ నగరాల్లో ఉన్నట్లు సిబిఐ గుర్తించింది. వాటిని గాలి జనార్దన్ రెడ్డి 2004 తర్వాతనే సంపాదించినట్లు చెబుతున్నారు. వీటితో మరిన్ని ఆస్తులను గుర్తించేందుకు సిబిఐ ప్రయత్నిస్తోంది. ప్రస్తుతం సిబిఐ అదుపులో ఉన్న గనుల శాఖ మాజీ డైరెక్టర్ రాజగోపాల్ గాలి జనార్దన్ రెడ్డికి చెందిన కొన్ని ఆస్తుల వివరాలను వెల్లడించినట్లు సమాచారం.

సిబిఐ అధికారుల సమాచారం మేరకు గాలి జనార్దన్ రెడ్డి అనుచరుడు హుస్సేన్ పీరాను బళ్లారి పోలీసులు ప్రశ్నించినట్లు సమాచారం. కర్ణాటక, ఆంధ్రప్రదేశ్ రాష్ట్రాల్లో గాలి జనార్దన్ రెడ్డి రెండు పాస్‌పోర్టులున్నట్లు ఈ సందర్భంగా వెల్లడైంది. దీంతో గాలి జనార్దన్ రెడ్డిపై బళ్లారిలో మరో కేసు నమోదైంది. గాలి జనార్దన్ రెడ్డి ఆదాయం పన్ను శాఖకు రూ. 123 కోట్లు బకాయి ఉన్నట్లు సమాచారం. దాన్ని వసూలు చేసుకోవడానికే ఆదాయం పన్ను శాఖ సిబిఐ స్వాధీనం చేసుకున్న సొమ్మును తమకు అప్పగించాలని కోరుతోంది. ఇందుకుగాను ఆదాయం పన్ను శాఖ కోర్టును ఆశ్రయించింది.

English summary

According to reports - CBI has identified Rs 1500 crores value assets of Gali Janardhan Reddy.