సిఎం క్యాంపు ఆఫీసు వద్ద ధర్నా,మంత్రి రచ్చబండ రచ్చ

హైదరాబాద్/వరంగల్: ఎస్ఐ అభ్యర్థుల వయో పరిమితి మరో మూడేళ్లు పెంచాలని డిమాండ్ చేస్తూ సుమారు వెయ్యి మంది అభ్యర్థులు గురువారం హైదరాబాదులో ముఖ్యమంత్రి క్యాంప్ కార్యాలయం వద్ద గురువారం ధర్నాకు దిగారు. సిఎంను కలిసేందుకు భద్రతా సిబ్బంది అనుమతి ఇవ్వక పోవడంతో వారు మంజీరా అతిథి గృహం వద్ద ఆందోళన చేపట్టారు. దీంతో అక్కడ భారీగా పోలీసులను మోహరించారు. వయోపరిమితి పెంచకుంటే తాము రేపటి నుండి రోడ్డెక్కుతామని హెచ్చరించారు. వీరికి బిసి నేత ఆర్ కృష్ణయ్య మద్దతు పలికారు.

కాగా వరంగల్ పట్టణంలోని మంత్రి పాల్గొన్న రచ్చబండ కార్యక్రమం రచ్చరచ్చ అయింది. బ్యాంక్ కాలనీలోని రచ్చబండ కార్యక్రమంలో బిసి సంక్షేమ శాఖ మంత్రి బస్వరాజు సారయ్య పాల్గొన్నారు. స్థానిక మహిళలు మంత్రిని తమ తమ సమస్యలపై నిలదీశారు. ఇళ్ల పట్టాలు, రేషన్ కార్డులు ఇవ్వాలని మహిళలు ఆందోళనకు దిగారు. మంత్రిని అడ్డుకునేందికు మహిళలతో పాటు పలువురు తెలంగాణవాదులు యత్నించడంతో పోలీసులు అక్కడ నుండి వారిని బయటకు ఈడ్చుకు వెళ్లారు. పరిస్థితి ఉద్రిక్తంగా మారడంతో భారీగా పోలీసులను మోహరించారు. పలువురిని అరెస్టు చేశారు. భారీ పోలీసు బందోబస్తు మధ్య సారయ్య రచ్చబండ కార్యక్రమం కొనసాగింది.

English summary

SI candidates make dharna at CM Kiran Kumar Reddy camp office today.