చంద్రబాబు తనయుడు నారా లోకేష్‌కు ఈడి నోటీసు

By Pratap

Published: Tuesday, November 22, 2011, 21:47 [IST]

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడి ఆస్తుల కేసులో ఎన్‌ఫోర్స్‌మెంట్ డైరెక్టరేట్ (ఈడి) విచారణను ప్రారంభించింది. ఫెమా ఉల్లంఘనల కింద ఈడి మంగళవారం చంద్రబాబు నాయుడి కుమారుడు నారా లోకేష్‌కు, పార్లమెంటు సభ్యుడు సుజనా చౌదరి, ఎన్టీఆర్ మెమోరియల్ ట్రస్టుకు నోటీసులు జారీ చేసింది. ఈడి అధికారి ఒకరు స్వయంగా నోటీసులు ఇచ్చినట్లు సమాచారం. చంద్రబాబు సహా 13 మందిపై ప్రాథమిక విచారణ జరిపి తమకు సీల్డ్ కవర్లలో నివేదికలు ఇవ్వాలని హైకోర్టు సిబిఐకి, ఈడికి, డిజిపికి, హోం శాఖ కార్యదర్శికి ఆదేశాలు జారీ చేసిన విషయం తెలిసిందే. హైకోర్టు ఆదేశాల మేరకు ఈడి బృందం రంగంలోకి దిగింది. ఢిల్లీ నుంచి హైదరాబాదుకు ఓ బృందం చేరినట్లు తెలుస్తోంది. వారంలోగా సంబంధిత పత్రాలను తమకు సమర్పించాలని ఈడి ఆదేశించింది.

కాగా, చంద్రబాబు ఆస్తుల కేసులో హైకోర్టు ఆదేశాలను సవాల్ చేస్తూ రామోజీ రావుకు ఉషోదయా పబ్లికేషన్స్, తెలుగుదేశం పార్టీ పార్లమెంటు సభ్యుడు నామా నాగేశ్వరరావుకు చెందిన మధుకాన్ ఇండస్ట్రీస్, తెలుగుదేశం నాయకుడు సిఎం రమేష్ వేసిన పిటిషన్లు రేపు బుధవారం మధ్యాహ్నం సుప్రీంకోర్టులో విచారణకు వచ్చే అవకాశం ఉంది. తాము చంద్రబాబుకు బినామీలం కాదని, చంద్రబాబు ముఖ్యమంత్రిగా ఉన్నప్పుడు తాము ప్రభుత్వం నుంచి ఏ విధమైన సహాయం పొందలేదని, తమపై నిరాధారమైన ఆరోపణలు చేశారని అంటూ తమపై విచారణ జరపవద్దని ఆదేశించాలని ఆ సంస్థలు కోరాయి.

Published On November 22, 2011