సిఎం కిరణ్ కుమార్‌ను తెగ పొగిడిన తెలంగాణ నేతలు

By Srinivas

Published: Tuesday, November 22, 2011, 16:48 [IST]

హైదరాబాద్: ముఖ్యమంత్రి కిరణ్ కుమార్ రెడ్డిపై తెలంగాణ ప్రాంత కాంగ్రెసు ప్రజా ప్రతినిధులు ప్రశంసల వర్షం కురిపించారు. రంగారెడ్డి జిల్లా ఎల్బీ నగర్ రచ్చబండ కార్యక్రమంలో పాల్గొన్న పార్లమెంటు సభ్యులు సర్వే సత్యనారాయణ సిఎంను పొగడ్తలతో ముంచెత్తారు. తెలంగాణ ప్రాంత ఎంపీలంతా సిఎం వ్యవహార శైలిపై ఒంటికాలుపై లేస్తుంటే సర్వే మాత్రం అందుకు విరుద్దంగా వెళుతున్నారు. కిరణ్ సిఎం కావడం రాష్ట్ర ప్రజల అదృష్టమని అన్నారు. ఆయన ఆధ్వర్యంలో ప్రజలకు అభివృద్ధి, సంక్షేమ కార్యక్రమాలు బాగా అమలవుతున్నాయన్నారు. సిఎం పథకాల ద్వారా మరింత బలపడుతున్నారన్నారు.

పంచాయతీ రాజ్ శాఖ మంత్రి జానారెడ్డి కూడా సిఎం పరిపాలన భేషుగ్గా ఉందని వేరుగా మీడియాతో అన్నారు. తెలంగాణపై తమ మౌనం వ్యూహాత్మకమేనని తేల్చి చెప్పారు. అధికారుల తీరుపై స్పందిస్తూ ఎవరైనా చట్టం, రాజ్యాంగం ప్రకారమే నడుచుకోవాల్సి ఉంటుందన్నారు. ఎవరి బాధ్యతలు వారికి ఉంటాయని వారే వాటిని నిర్వర్తించాల్సి ఉంటుందన్నారు. ఎవరి బాధ్యతలు వారు నిర్వర్తించనప్పుడు కోర్టులు కలుగజేసుకుంటాయన్నారు.

Published On November 22, 2011