హైకోర్టు పత్రాలు అందలేదు: బాబు కేసుపై సిబిఐ

By Pratap

Published: Wednesday, November 23, 2011, 22:42 [IST]

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడు ఆస్తులపై హైకోర్టు విచాణకు జారీ చేసిన ఆదేశాల పత్రాలు తమకు అందలేదని సిబిఐ జాయింట్ డైరెక్టర్ లక్ష్మినారాయణ చెప్పారు. పత్రాలు అందిన వెంటనే విచారణ ప్రారంభిస్తామని ఆయన బుధవారం మీడియా ప్రతినిధులతో అన్నారు. హైకోర్టు ఆదేశ పత్రాలు అందిన తర్వాత ప్రతివాదులందరికీ నోటీసులు జారీ చేస్తామని, తమ కార్యాలయానికి పిలిపించి వారిని విచారిస్తామని ఆయన చెప్పారు. తగిన పత్రాలతో తమ వద్దకు రావాలని ప్రతివాదులకు సూచిస్తామని ఆయన అన్నారు.

కర్ణాటక మాజీ మంత్రి గాలి జనార్దన్ రెడ్డికి ఓబుళాపురం మైనింగ్ కంపెనీ (ఒఎంసి) గనులకు సంబంధించి తప్ప ఇతర గనుల వ్యవహారాలపై వస్తున్న ఫిర్యాదులపై తాము స్పందించలేమని ఆయన చెప్పారు. చంద్రబాబు ఆస్తుల కేసులో ఎన్‌ఫోర్స్‌మెంట్ డైరెక్టరేట్ (ఈడి) ఇప్పటికే రంగంలోకి దిగింది. చంద్రబాబు సహా కొంత మందికి ఈడి నోటీసులు కూడా జారీ చేసింది.

Published On November 23, 2011