కిరణ్ కుమార్ రెడ్డిపై శంకర రావు మరోసారి ఫైర్

హైదరాబాద్: ముఖ్యమంత్రి కిరణ్ కుమార్ రెడ్డిపై జౌళి శాఖ మంత్రి పి. శంకరరావు మరోసారి తన ఆగ్రహావేశాలను వెళ్లగక్కారు. కిరణ్ కుమార్ రెడ్డి తనను పొమ్మన లేక పొగ పెడుతున్నారని, పొగ పెట్టినా భరిస్తానని, మంత్రివర్గంలో కొనసాగుతానని ఆయన సోమవారం మీడియా ప్రతినిధుల సమావేశంలో అన్నారు. కాంగ్రెసు అధిష్టానం చెప్తేనే తాను మంత్రి పదవి నుంచి తప్పుకుంటానని ఆయన అన్నారు. ముఖ్యమంత్రికి కోపం ఉంటే తనపై తీర్చుకోవాలని, చేనేత కార్మికులపై తీసుకోవడం సరి కాదని ఆయన అన్నారు. తనది ఎప్పటికీ దేహీ అనే శాఖనే అని ఆయన చెప్పుకున్నారు. నేతన్నలకు ఎంతో చేయాలని తనకు ఉందని, అయితే ఉన్నతాధికారులు తన మాట వినడం లేదని ఆయన అన్నారు.

సమీక్షా సమావేశాలకు ఆప్కో ఎండి హాజరు కావడం లేదని, ఇదేమిటని అడిగితే తనకు ముఖ్యమంత్రి అండదండలున్నాయని అంటున్నారని ఆయన చెప్పారు. చేనేత కార్మికుల సమస్యలపై ఈ నెల 30వ తేదీన అఖిల పక్ష సమావేశాన్ని లేక్‌వ్యూ అతిథి గృహంలో నిర్వహిస్తున్నట్లు ఆయన తెలిపారు. సచివాలయంలోని తన ఛేంబర్‌లో సమావేశం నిర్వహించడానికి ఫర్నీచర్ లేదని, ఎన్ని సార్లు చెప్పినా ఫలితం లభించడం లేదని ఆయన అన్నారు.

English summary

Minister P Shankar Rao has fired at CM Kiran Kumar Reddy once again.