అసెంబ్లీ స్తంభన, వాయిదా: టిడిపి, తెరాస చెరో దారి

హైదరాబాద్: శాసనసభ శనివారం కూడా స్తంభించింది. తెలుగుదేశం, తెలంగాణ రాష్ట్ర సమితి పార్టీలు చెరో వైఖరిని తీసుకుని ఆందోళనకు దిగడంతో సభా కార్యక్రమాలు స్తంభించాయి. ముఖ్యమంత్రి కిరణ్ కుమార్ రెడ్డి ప్రభుత్వంపై అవిశ్వాస తీర్మానానికి ఇచ్చిన నోటీసును అనుమతించాలని తెలుగుదేశం పార్టీ సభ్యులు, తెలంగాణపై తీర్మానానికి తెలంగాణ రాష్ట్ర సమితి (తెరాస) సభ్యులు పట్టుబడుతూ సభా కార్యక్రమాలను అడ్డుకున్నారు. దీంతో స్పీకర్ నాదెండ్ల మనోహర్ శనివారం ఉదయం సమావేశమైన కొద్ది సేపటికే పది నిమిషాల పాటు వాయిదా పడింది. తిరిగి సమావేశమైన తర్వాత కూడా పరిస్థితి అదుపులోకి రాలేదు.

తెలుగుదేశం, తెరాస సభ్యులు తమ తమ పట్టు వీడకపోవడంతో సభలో గందరగోళం చోటు చేసుకుంది. అవిశ్వాస తీర్మానంపై చర్చకు ప్రభుత్వం సిద్ధంగా ఉందని శాసనసభా వ్యవహారాల మంత్రి డి. శ్రీధర్ బాబు పదే పదే చెప్పారు. సభా కార్యక్రమాలను సజావుగా నడిపించుకుందామని ఆయన ప్రతిపక్షాలకు సూచించారు. అయితే, తెరాస, తెలుగుదేశం సభ్యులు మాట వినలేదు. దీంతో మరోసారి స్పీకర్ సభను అరగంట పాటు వాయిదా వేసి, ఫ్లోర్ లీడర్లతో సమావేశమయ్యారు. అవిశ్వాస తీర్మానం ప్రతిపాదించి ఓటింగు జరిగితే ప్రభుత్వం పడిపోతుందని, అందు వల్ల తెలంగాణ తీర్మానం సభలో చర్చకు రాకుండా పోతుందని తెరాస సభ్యులు అంటున్నారు. వరుసగా మూడో రోజు సభా కార్యక్రమాలు స్తంభించాయి.

English summary

Assembly proceedings stalled as TDP and TRS members were on their feet with their demands.