చిరు చెప్పేదాకా తెలియదు: బొత్స, ఢోకా లేదన్న కెవిపి

By Srinivas

Published: Sunday, December 4, 2011, 16:13 [IST]

హైదరాబాద్: తన వర్గం ఎమ్మెల్యేలు ప్రత్యేకంగా భేటీ అవుతున్నట్లు తిరుపతి శాసనసభ్యుడు చిరంజీవి చెప్పేదాకా తనకు తెలియదని పిసిసి చీఫ్ బొత్స సత్యనారాయణ ఆదివారం అన్నారు. అసంతృప్తి చిరంజీవిలో లేదని ఆయన వర్గం ఎమ్మెల్యేల్లో మాత్రమే ఉందని ఆయన అన్నారు. ఆ ఎమ్మెల్యేలకు కొన్ని ఇబ్బందులు ఉన్నమాట నిజమేనని, అవన్నీ తొలగిపోయాయని తాను భావించానన్నారు. వారి సమస్యలను తీరుస్తామని చెప్పారు. పిఆర్పీ ఎమ్మెల్యేలు ఉన్నచోట వారినే ఇంచార్జులుగా నియమించాలని ఏఐసిసి అధ్యక్షురాలు సోనియా గాంధీని కోరినట్లు చెప్పారు. కాంగ్రెసు, పిఆర్పీ ఎమ్మెల్యేలు మాకు సమానమే అని చెప్పారు.

రాష్ట్ర ప్రభుత్వానికి ఎలాంటి ఇబ్బంది లేదని కెవిపి రామచంద్రా రావు వేరుగా అన్నారు. రేపు అవిశ్వాస తీర్మానం పెట్టినప్పుడు ఎవరు ఎటువైపో తేలిపోతుందన్నారు. కాంగ్రెసు పార్టీలో ఎలాంటి సంక్షోభం లేదని కొట్టిపారేశారు. కాగా ఆయన సిఎం కిరణ్ కుమార్ రెడ్డి, పిసిసి చీఫ్ బొత్స సత్యనారాయణతో భేటీ అయ్యారు.

Published On December 4, 2011