గులాం నబీ ఆజాద్‌తో దాసరి నారాయణ రావు భేటీ

By Srinivas

Published: Sunday, December 4, 2011, 9:34 [IST]

హైదరాబాద్: కేంద్రమంత్రి, రాష్ట్ర వ్యవహారాల ఇంచార్జ్ గులాం నబీ ఆజాద్‌‌తో ప్రముఖ దర్శకుడు, మాజీ కేంద్రమంత్రి దాసరి నారాయణ రావు శనివారం సాయంత్రం భేటీ అయ్యారు. వారిరువురి భేటీలో ప్రధానంగా తాజా రాజకీయ పరిణామాలు చర్చకు వచ్చినట్లుగా తెలుస్తోంది. అవిశ్వాస తీర్మానం నేపథ్యంలో ఆ అంశం కూడా వారి మధ్య చర్చకు వచ్చినట్లుగా తెలుస్తోంది. కాగా చిరంజీవి తన ప్రజారాజ్యం పార్టీని కాంగ్రెసు పార్టీలో విలీనం చేయడానికి ముందు దాసరి కాంగ్రెసు పార్టీలో ప్రధాన పాత్ర వహించిన విషయం తెలిసిందే.

చిరు పిఆర్పీని విలీనం చేసిన తర్వాత దాసరి నారాయణ రావు పార్టీకి దాదాపు దూరమయ్యారనే చెప్పవచ్చు. ఆయన పార్టీ కార్యక్రమాల్లో చురుగ్గా పాల్గొనడం తగ్గింది. కాగా చాలారోజుల తర్వాత ఆయన పార్టీ నేతలను కలుసుకోవడం గమనార్హం. దాసరి రాష్ట్రవ్యవహారాల ఇంచార్జ్ ఆజాద్‌తో భేటీ కావడం వల్ల ఆయన మరోసారి రాష్ట్ర కాంగ్రెసులో చురుకైన పాత్ర పోషించే అవకాశాలు ఉన్నాయని పలువురు అభిప్రాయపడుతున్నారు.

Published On December 4, 2011