మా వాళ్లే: జగన్, చిరు ఎమ్మెల్యేలకు అధిష్టానం బాసట

By Srinivas

Published: Sunday, December 4, 2011, 11:55 [IST]

న్యూఢిల్లీ: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి వర్గం కాంగ్రెసు ఎమ్మెల్యేలు, ప్రజారాజ్యం పార్టీ ఎమ్మెల్యేలకు కాంగ్రెసు పార్టీ అధిష్టానం ఆదివారం బాసటగా నిలిచింది. విలీనం జరిగి ఇన్నాళ్లైనా తమకు సరియైన ప్రాధాన్యం లభించడం లేదన్న పిఆర్పీ ఎమ్మెల్యేల ఆందోళనకు రాష్ట్ర వ్యవహారాల ఇంచార్జ్ గులాం నబీ ఆజాద్ స్పందించారు. ఆజాద్ ఆదివారం చిరంజీవికి ఫోన్ చేశారు. పార్టీలో చిరంజీవి, పిఆర్పీ ఎమ్మెల్యేలకు సముచిత ప్రాధాన్యం ఉంటుందని స్పష్టం చేశారు. ఏ ఒక్కరూ అసంతృప్తి చెందాల్సిన అవసరం లేదని ప్రతి ఒక్కరికి సమ ప్రాధాన్యం ఇస్తామని ఆజాద్ చిరంజీవికి ఫోన్‌లో హామీ ఇచ్చారు.

మరోవైపు జగన్ వర్గం కాంగ్రెసు ఎమ్మెల్యేలకు కూడా అధిష్టానం బాసటగా నిలిచింది. కొన్నాళ్లు పార్టీకి దూరమైనంత మాత్రాన వారు మా పార్టీ ఎమ్మెల్యేలు కాకుండా పోరని చెప్పారు. గాంధీ భవన్‌కు ఖచ్చితంగా రావాల్సిందేనన్న పిసిసి చీఫ్ బొత్స వ్యాఖ్యలతోనూ అధిష్టానం విభేదించింది. జగన్ వర్గం ఎమ్మెల్యేలు ఖచ్చితంగా పార్టీ కార్యాలయానికి రావాల్సిందంటూ నిబంధన ఏమీ లేదని చెప్పింది. వారు కొంతకాలం పార్టీకి దూరంగా ఉంటున్నప్పటికీ ఇప్పటికీ కాంగ్రెసు ఎమ్మెల్యేలుగానే పరిగణిస్తున్నామని, వాళ్లను ప్రత్యేకంగా చూస్తున్నామన్న వ్యాఖ్యల్లో నిజం లేదని పేర్కొంది.

Published On December 4, 2011