వైయస్ పాదయాత్ర ఓ కుట్ర: రేవంత్ రెడ్డి, జగన్‌పై సెటైర్

హైదరాబాద్: దివంగత ముఖ్యమంత్రి వైయస్ రాజశేఖర రెడ్డి 2004 ఎన్నికలకు ముందు చేపట్టిన పాదయాత్ర వెనుక అవినీతి కుట్ర ఉందని తెలుగుదేశం పార్టీ శాసనసభ్యుడు రేవంత్ రెడ్డి సోమవారం అసెంబ్లీలో విమర్శించారు. రైతు పేరుతో పాదయాత్ర చేసి అధికారంలోకి వచ్చిన తర్వాత రాష్ట్ర ప్రజలను కాంగ్రెసు తీవ్రంగా మోసం చేసిందనిధ్వజమెత్తారు. మేం ఎక్కాల్సిన రైలు జీవిత కాలం లేటు అయ్యిందో లేదో కానీ కాంగ్రెసు ఎక్కిన రైలు మాత్రం ఢిల్లీలో కుదువ పెట్టబడిందన్నారు. ఈ రాష్ట్రాన్ని రన్ బ్యాచ్, గన్ బ్యాచ్ శాసిస్తున్నాయన్నారు. రన్ బ్యాచ్ అంటే జగన్ వర్గం ఎమ్మెల్యేలు అన్నారు. కాంగ్రెసును పంచెలూడదీసి కొడతామన్న వాళ్లు ఇప్పుడు దానికి అండగా నిలబడుతున్నారని విమర్శించారు.

ఈ సందర్భంగా ఆయన ప్రభుత్వ తీరును తప్పు పడుతూ పిసిసి చీఫ్ బొత్స సత్యనారాయణ, మంత్రులు డిఎల్ రవీంద్రా రెడ్డిలు మంత్రివర్గ సమావేశంలో ముఖ్యమంత్రిని నిలదీసిన అంశాన్ని, మంత్రి శంకర్ రావు తోటి మంత్రులపై గవర్నర్‌కు ఫిర్యాదు చేసిన అంశాన్ని ప్రస్తావించారు. ముఖ్యమంత్రి, మంత్రులు ప్రజల విశ్వాసం కోల్పోయారు కాబట్టే ప్రభుత్వంపై అవిశ్వాసం పెట్టామన్నారు. కిరణ్ ప్రభుత్వానికి ఒక్క నిమిషం కూడా అధికారంలో కొనసాగే హక్కు లేదన్నారు. నిత్యావసర వస్తువులు నిత్యం ప్రజలను కాల్చుకు తింటున్నాయన్నారు. రచ్చబండ ప్రజల పాలిట గుదిబండగా మారిందన్నారు.

ప్రభుత్వం ఇస్తున్న రూపాయికి కిలో బియ్యం గాడిదకు పెడుతున్నారని, బియ్యంలో అరకిలో పురుగులు ఉంటున్నాయని ధ్వజమెత్తారు. రైతు ప్రభుత్వమంటే భారీగా ధరలు పెంచడమేనా అని ప్రశ్నించారు. ఈనాటి తమ అవిశ్వాసానికి 2004 పునాది అన్నారు. తెలంగాణ అంశాన్ని తేల్చాల్సింది కాంగ్రెసు పార్టీయే అన్నారు. తెలంగాణ ఉద్యమంలో పాల్గొంటున్న విద్యార్థులపై ప్రభుత్వం తూటాలు పేల్చుతుందన్నారు. విద్యార్థుల ఆగ్రహ జ్వాల నుండి తెలంగాణ ఉద్యమం పుట్టుకు వచ్చిందన్నారు.

English summary

TDP MLA Revanth Reddy fired at late YS Rajasekhar Reddy and Congress government. He said YS Padayatra is a strategy.