సుధాకర్ నిర్బంధంపై టి - కాంగ్రెసు ఎంపీలు గరం

By Pratap

Published: Wednesday, December 7, 2011, 19:33 [IST]

న్యూఢిల్లీ: తెలంగాణ రాష్ట్ర సమితి (తెరాస) పోలిట్ బ్యూరో సభ్యుడు చెరుకు సుధాకర్‌ను ప్రభుత్వం ఏడాది పాటు నిర్బంధించడంపై కాంగ్రెసు తెలంగాణ పార్లమెంటు సభ్యులు ముఖ్యమంత్రి కిరణ్ కుమార్ రెడ్డి ప్రభుత్వంపై తీవ్రంగా మండిపడ్డారు. చెరుకు సుధాకర్ నిర్బంధానికి నిరనసగా కాంగ్రెసు తెలంగాణ ప్రాంత పార్లమెంటు సభ్యులు బుధవారం సభ బహిష్కరించి వెలుపల ప్రదర్శన చేశారు. తెలంగాణ ఉద్యమకారులపై ప్రభుత్వం నిర్బంధాన్ని ప్రయోగించడం సరి కాదని కాంగ్రెసు తెలంగాణ ప్రాంత పార్లమెంటు సభ్యుడు మధు యాష్కీ అన్నారు. చెరుకు సుధాకర్‌ను నిర్బంధించిన విషయాన్ని తాము కేంద్ర ప్రభుత్వం దృష్టికి, కాంగ్రెసు అధిష్టానం దృష్టికి తీసుకుని వెళ్లామని ఆయమ మీడియా ప్రతినిధులతో చెప్పారు. చెరుకు సుధాకర్‌ను నిర్బంధించడమే కాకుండా విద్యార్థులపై కేసులు పెట్టి నిర్బంధించిందని ఆయన విమర్శించారు.

గతంలో ముఖ్యమంత్రి కిరణ్ కుమార్ రెడ్డి ఇచ్చిన హామీ మేరకు విద్యార్థులపై కేసులను ఎత్తేయాలని ఆయన కోరారు. చేరుకు సుధాకర్‌ను వెంటనే విడుదల చేయాలని ఆయన డిమాండ్ చేశారు. తెలంగాణ రాష్ట్ర ఏర్పాటుకు శాసనసభలో తీర్మానం జరిగితే బాగుండేదని ఆయన అన్నారు. విద్యార్థుల విడుదలకు తెలంగాణ మంత్రులు, శానససభ్యులు ముఖ్యమంత్రిపై ఒత్తిడి తేవాలని ఆయన సూచించారు. తెలంగాణ శానససభ్యుల బలంతోనే ముఖ్యమంత్రి కిరణ్ కుమార్ రెడ్డి ప్రభుత్వం అవిశ్వాసం నుంచి గట్టెక్కిందని ఆయన అన్నారు. తెలంగాణకు అనుకూలంగా కేంద్రం నిర్ణయం తీసుకుంటుందనే ఉద్దేశంతో తెలంగాణ శాసనసభ్యులు ప్రభుత్వానికి సహకరించారని ఆయన చెప్పారు. పార్లమెంటు సభ్యులు మందా జగన్నాథం, రాజయ్య కూడా మీడియా ప్రతినిధులతో మాట్లాడారు.

Published On December 7, 2011