తెలంగాణ పోరు ఆగలేదు, ఉధృతం చేస్తాం: కోదండరామ్

హైదరాబాద్: తెలంగాణ ఉద్యమం ఆగిపోలేదని, దాన్ని మరింత ఉధృతం చేస్తామని తెలంగాణ రాజకీయ జెఎసి చైర్మన్ కోదండరామ్ అన్నారు. తెలంగాణ జెఎసి స్టీరింగ్ కమిటీ సమావేశం తీసుకున్న నిర్ణయాలను ఆయన గురువారం మీడియా ప్రతినిధుల సమావేశంలో వెల్లడించారు. 2009లో కేంద్ర ప్రభుత్వం తెలంగాణ రాష్ట్రాన్ని ప్రకటించిన డిసెంబర్ 9వ తేదీన పురస్కరించుకుని శుక్రవారం తెలంగాణ ఆత్మగౌరవం దినంగా పాటించనున్నట్లు ఆయన చెప్పారు. నిర్ణయాన్ని వెనక్కి తీసుకుంటూ ప్రకటన చేసిన తేదీని పురస్కరించుకుని 23వ తేదీని విద్రోహ దినంగా పాటించనున్నట్లు ఆయన తెలిపారు. ఆత్మగౌరవ దినం సందర్భంగా రేపు ఉదయం హైదరాబాదులోని గన్ పార్కు వద్ద తెలంగాణ జెండాను ఆవిష్కరిస్తామని, సాయంత్రం ఐదు గంటల నుంచి రాత్రి 12 గంటల వరకు తెలంగాణ జాగరణ కార్యక్రమాన్ని నిర్వహిస్తామని ఆయన చెప్పారు.

తెలంగాణ ఆత్మగౌరవ దినాన్ని పురస్కరించుకుని రేపు తెలంగాణవ్యాప్తంగా వివిధ కార్యక్రమాలు చేపట్టాలని ఆయన పిలుపునిచ్చారు. ఉస్మానియా విశ్వవిద్యాలయం విద్యార్థులు రేపు దీక్షలు చేస్తారని ఆయన చెప్పారు. తెలంగాణ రాష్ట్ర సమితి (తెరాస) పోలిట్‌బ్యూరో సభ్యుడు చెరుకు సుధాకర్‌ను విడుదల చేయాలనే హైకోర్టు తీర్పును ఆయన స్వాగతించారు. రాష్ట్రాల ఏర్పాటుపై ఏకాభిప్రాయం అవసరమని కేంద్ర మంత్రి జితేంద్ర రాజ్యసభవలో చేసిన ప్రకటనను ఆయన ఖండించారు. రాజ్యాంగ విరుద్ధంగా మంత్రులు మాట్లాడుతున్నారని ఆయన విమర్శించారు.

English summary

Telangana JAC chairman Kodandaram said that Telangana movement will be intensified.