తెలంగాణ ప్రకటనకు రెండేళ్లు: విషమించిన రాష్ట్ర పరిస్థితి

By Pratap

Published: Friday, December 9, 2011, 10:31 [IST]

న్యూఢిల్లీ: తెలంగాణ రాష్ట్ర ఏర్పాటుకు ప్రక్రియను ప్రారంభిస్తున్నట్లు కేంద్ర హోం మంత్రి పి. చిదంబరం చేసిన ప్రకటనకు రేపటితో రెండేళ్లు నిండుతున్నాయి. 2009 డిసెంబర్ 9వ తేదీన ఆయన ఆ ప్రకటన చేశారు. కాంగ్రెసు అధ్యక్షురాలు సోనియా గాంధీ పుట్టిన రోజున ఆ ప్రకటనను యాదృచ్ఛికంగా చేశారో, కావాలని చేశారో తెలియదు. జన్మ దిన కానుకగా ఆ ప్రకటన వెలువడినందుకు కాంగ్రెసు తెలంగాణ నేతలు సోనియా గాంధీకి తెలంగాణ నేతలు బారులు కట్టి కృతజ్ఞతలు తెలిపారు. అది జరిగి రెండేళ్లు అవుతోంది. ఈ జన్మదిన వేడుకలకు సోనియా గాంధీ దూరంగా ఉంటున్నారు. తనకు అభినందనలు తెలిపేందుకు ఎవరూ రావద్దని ఆమె కోరారు. అయితే, తెలంగాణ సమస్య వల్ల రాష్ట్ర పరిస్థితి ఈ రెండేళ్లలో బాగుపడడానికి బదులు మరింత విషమించింది.

తెలంగాణ అంశంపై కేంద్ర ప్రభుత్వం వేసిన శ్రీకృష్ణ కమిటీ నివేదిక సమర్పించి కూడా ఏడాది దాటుతోంది. సమస్యను పరిష్కరించడానికి శ్రీకృష్ణ కమిటీ నిర్దిష్టమైన సిఫార్సు చేయడంలో విఫలమైంది. ఆరు సిఫార్సులు చేసి సమస్యను మరింత జఠిలం చేసింది. పరస్పర విరుద్ధమైన సిపార్సుల వల్ల తెలంగాణకు పరిష్కారం దొరకకపోగా ఎక్కడ వేసిన గొంగళి అక్కడే అన్నట్లు తేల్చింది. ఆ సిఫార్సులను అమలు చేయడమనేది సాధ్యమయ్యే పని కాదు. ఆ నివేదిక తెలంగాణ సమస్యను మళ్లీ మొదటికి తెచ్చింది. రాష్ట్రంలో పరిస్థితి మాత్రం తీవ్రంగా విషమించింది.

కాంగ్రెసు తెలంగాణ నాయకులు తీవ్రంగా ఇబ్బందులు పడుతున్నారు. తమ తమ నియోజకవర్గాల్లో తిరుగలేని పరిస్థితి వారికి ఏర్పడింది. భవిష్యత్తు అంధకారంలా మారింది. తెలంగాణ రాష్ట్ర సమితి (తెరాస) పుంజుకుంది. సకల జనుల సమ్మెతో రాష్ట్రం అతలాకుతలంగా మారింది. ఇటీవలి కాలంలో పరిస్థితి కాస్తా సద్దుమణిగినట్లు కనిపిస్తున్నప్పటికీ ఎప్పుడు నిప్పు రాజుకుంటుందో తెలియని పరిస్థితి. 2014లో వచ్చే ఎన్నికల నాటికి కూడా తెలంగాణ అంశాన్ని తెల్చే ఉద్దేశం కాంగ్రెసుకు లేదని అంటున్నారు. ఏమైనా, తెలంగాణ నాయకులకు రాజకీయాలు కత్తి మీద సాములా మారాయి.

Published On December 9, 2011