జగన్ వర్గంపై వేటు పడుతుంది: మాజీ మంత్రి గాదె

By Srinivas

Published: Friday, December 9, 2011, 8:51 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి వర్గం శాసనసభ్యులందరి పైనా ఒకేసారి వేటు పడుతుందని తాను భావిస్తున్నానని మాజీ మంత్రి గాదె వెంకట్ రెడ్డి గురువారం అభిప్రాయపడ్డారు. ఆయన కాంగ్రెసు పార్టీ కార్యాలయంలో విలేకరులతో మాట్లాడారు. జగన్ వర్గం ఎమ్మెల్యేలపై వేటు పడటం, ఆ తర్వాత ఉప ఎన్నికల ఫలితాలపై ఇప్పటి నుంచే అభిప్రాయాలు వెల్లడించడం సరికాదని ఆయన అన్నారు. అదే సమయంలో కాంగ్రెసు అభ్యర్థులే విజయం సాధిస్తారని కూడా ఆయన ధీమా వ్యక్తం చేశారు.

అవిశ్వాస తీర్మానంపై ఓటింగులో పద్దెనిమిది మంది ఎమ్మెల్యేలు వైయస్ జగన్మోహన్ రెడ్డి అవినీతి సొమ్ముకు అమ్ముడుపోయిన అంగడి సరుకని సీనియర్ కాంగ్రెసు నేత ఎన్.తులసి రెడ్డి ధ్వజమెత్తారు. రాష్ట్రంలో కాంగ్రెసు పార్టీని ప్రజలు ఆదరిస్తున్నారన్నారు. కాగా ఇటీవల అవిశ్వాస తీర్మానం సమయంలో జగన్ వర్గానికి చెందిన పదహారు మంది కాంగ్రెసు ఎమ్మెల్యేలు ప్రభుత్వానికి వ్యతిరేకంగా ఓటు వేసిన విషయం తెలిసిందే.

Published On December 9, 2011