చిరంజీవిపై జగన్ వర్గం ఎమ్మెల్యే శోభా నాగిరెడ్డి ఫైర్

By Pratap

Published: Friday, December 9, 2011, 18:40 [IST]

హైదరాబాద్: తనపై అనర్హత వేటు వేయాలని స్పీకర్ నాదెండ్ల మనోహర్‌కు పిటిషన్ ఇవ్వడంపై వైయస్సార్ కాంగ్రెసు పార్టీ అధ్యక్షుడు వైయస్ జగన్ వర్గానికి చెందిన ప్రజారాజ్యం పార్టీ శానససభ్యురాలు శోభా నాగిరెడ్డి చిరంజీవిపై తీవ్రంగా మండిపడ్డారు. పార్టీని కాంగ్రెసులో విలీనం చేసిన చిరంజీవి, తనపై చర్యల కోసమే ప్రజారాజ్యం శాసనసభా పక్షాన్ని విలీనం చేయలేదని తనకు తెలుసునని ఆమె శుక్రవారం అన్నారు. కాంగ్రెసు పార్టీకి వ్యతిరేకంగా ప్రజారాజ్యం పార్టీ ఆనాడు ఎన్నికల్లో పోటీ చేసిందని, అందువల్ల తాను ప్రజారాజ్యం పార్టీని కాంగ్రెసులో విలీనం చేయడాన్ని వ్యతిరేకించానని, ఈ మేరకు తాను స్పీకర్‌కు లేఖ ఇచ్చానని, ఎన్నికల కమిషన్‌కు ఆ లేఖను పంపానని, తనను ప్రజారాజ్యం పార్టీ ఎమ్మెల్యేగా గానీ స్వతంత్ర సభ్యురాలిగా గానీ గుర్తించాలని కోరానని ఆమె వివరించారు.

ప్రజారాజ్యం పార్టీని కాంగ్రెసులో విలీనం చేసిన చిరంజీవికి గానీ, ఆ పార్టీ విప్ వంగా గీతకు గానీ తనపై చర్యలు తీసుకోవాలని ఫిర్యాదు చేసే హక్కు ఉందా అని ఆలోచించుకోవాలని ఆమె సూచించారు. తనపై చర్యలు తీసుకోవాలని కాంగ్రెసు తరఫున ఫిర్యాదు చేశారా, ప్రజారాజ్యం పార్టీ తరఫున ఫిర్యాదు చేశారా చెప్పాలని ఆమె అడిగారు. తనపై ఫిర్యాదు చేసేందుకు ఏ విధమైన హక్కు ఉందో వారు తెలుసుకుంటే మంచిదని ఆమె అన్నారు. తాను అన్నింటికీ సిద్ధపడే అవిశ్వాస తీర్మానానికి అనుకూలంగా ఓటేశానని, తానేమీ భయపడలేదని ఆమె అన్నారు. వంగా గీత తనపై చేసిన ఫిర్యాదును చూసి ప్రజలు నవ్వుతున్నారని ఆమె వ్యాఖ్యానించారు.

Published On December 9, 2011