మీడియాను మాట్లాడని కెసిఆర్, సుధాకర్‌కు పరామర్శ

By Pratap

Published: Saturday, December 10, 2011, 17:22 [IST]

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు మీడియాను పట్టించుకోలేదు. యశోదా ఆస్పత్రిలో చికిత్స పొందుతున్న తమ పార్టీ పోలిట్‌బ్యూరో సభ్యుడు డాక్టర్ చెరుకు సుధాకర్‌ను ఆయన శనివారం పరామర్శించారు. ఈ సందర్భంగా అక్కడికి వచ్చిన మీడియాతో మాట్లాడకుండానే ఆయన వెళ్లిపోయారు. పిడి యాక్ట్ కింద అరెస్టయిన చెరుకు సుధాకర్ హైకోర్టు ఆదేశాలతో విడుదలయ్యారు. అనారోగ్యంతో బాధపడుతున్న ఆయన యశోదా ఆస్పత్రిలో చికిత్స పొందుతున్నారు. దీంతో కెసిఆర్ ఆయనను పరామర్సించడానకి యశోదా ఆస్పత్రికి వచ్చారు. సుధాకర్‌ను పరామర్శించిన తర్వాత మీడియాతో మాట్లాడకుండా వెళ్లిపోయారు.

తెలంగాణపై కాంగ్రెసు అధిష్టానం తనతో మాట్లాడినట్లు వచ్చిన వార్తలపై వివరణ ఇవ్వాల్సి వస్తుందని అనుకున్నారో, ఏమో ఆయన మీడియా వైపు చూడలేదు. కాంగ్రెసు పార్టీ అధ్యక్షురాలు సోనియా గాంధీ రాజకీయ సలహాదారు అహ్మద్ పటేల్‌ కెసిఆర్‌తో మాట్లాడినట్లు వార్తలు వచ్చాయి. ఆ విషయంపై తాను మాట్లాడితే తప్పుడు సంకేతాలు వెళ్తాయనే ఉద్దేశంతోనో, మీడియా నుంచి మరిన్ని ప్రశ్నలు వస్తాయనో ఆయన మీడియాను పట్టించుకోలేదు. మూడు రోజుల పాటు ఎవరికీ కనిపించకుండా, చెప్పకుండా ఫామ్‌ హౌస్‌లో విశ్రాంతి తీసుకున్న విషయంపై కూడా ప్రశ్నలు వస్తాయనే ఉద్దేశంతో ఆయన మీడియాకు దూరంగా ఉున్నట్లు చెబుతున్నారు. తెలంగాణపై కాంగ్రెసు అధిష్టానం తీసుకునే నిర్ణయం విషయంలో తన ప్రమేయం ఉందనే విమర్శలను తప్పించుకోవడానికే కెసిఆర్ మీడియాతో మాట్లాడలేదని అంటున్నారు.

Published On December 10, 2011