ఆజాద్‌తో జగన్ వర్గం ఎమ్మెల్యేలపై సిఎం కిరణ్ చర్చలు

న్యూఢిల్లీ: వైయస్సార్ కాంగ్రెసు పార్టీ అధ్యక్షుడు వైయస్ జగన్ వర్గానికి చెందిన శానససభ్యులపై చర్యలే ఎజెండాగా ముఖ్యమంత్రి కిరణ్ కుమార్ రెడ్డి కాంగ్రెసు ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్‌తో శనివారం చర్చలు జరిపారు. రాష్ట్రానికి చెందిన వివిధ అంశాలపై చర్చకు ఆజాద్ ముఖ్యమంత్రి కిరణ్ కుమార్ రెడ్డిని, పిసిసి అధ్యక్షుడు బొత్స సత్యనారాయణను ఢిల్లీకి ఆహ్వానించారు. విప్‌ను ధిక్కరించి ప్రభుత్వానికి వ్యతిరేకంగా అవిశ్వాస తీర్మానంపై ఓటేసిన జగన్ వర్గానికి చెందిన శాసనసభ్యుల్లో 16 మంది కాంగ్రెసు పార్టీకి చెందినవారున్నారు. విప్‌ను ధిక్కరించినవారిపై వేటు వేస్తే రాష్ట్రంలో 26 శానససభా స్థానాలకు ఉప ఎన్నికలు జరుగుతాయి. అలాంటి స్థితిలో కాంగ్రెసు పార్టీ వాటిని సమర్థంగా ఎదుర్కోగలదా, అందుకు ఏ విధమైన వ్యూహం అనుసరించాలనే అంశాలపై ఇరువురి మధ్య చర్చలు జరిగాయి.

కాంగ్రెసుకు తిరిగి రావడానికి జగన్ వర్గం శాసనసభ్యులకు అవకాశం ఇవ్వాలని, తిరిగి వస్తే చర్యలుండవనే సంకేతాలు ఇవ్వాలని వారిద్దరు అభిప్రాయపడినట్లు తెలుస్తోంది. అయితే, గులాం నబీ ఆజాద్ బొత్స సత్యనారాయణతో చర్చించిన తర్వాతనే ఈ విషయం నిర్ణయం జరుగుతుంది. కాగా, తెలంగాణ అంశంపై, రాష్ట్రంలోని తాజా పరిస్థితులపై కిరణ్ కుమార్ రెడ్డి ఆజాద్‌కు వివరించినట్లు తెలుస్తోంది. తెలంగాణ అంశాన్ని తేల్చిన తర్వాతనే మంత్రి వర్గ విస్తరణ ఉంటుందని ఆజాద్ శుక్రవారంనాడు ప్రకటించారు. దీంతో తెలంగాణపై ముఖ్యమంత్రితో ఆజాద్ మాట్లాడినట్లు చెబుతున్నారు. దీంతో కొత్త సంవత్సరం ఆరంభంలో తెలంగాణపై కేంద్ర ప్రభుత్వం నిర్ణయం తీసుకోవచ్చుననే ఊహాగానాలు చెలరేగుతున్నాయి. ప్రజారాజ్యం పార్టీ శానససభ్యులకు మంత్రివర్గంలో ఇవ్వాల్సిన స్థానాలపై కూడా చర్చ జరిగినట్లు తెలుస్తోంది.

English summary

CM Kiran Kumar Reddy has met Congress AP affairs incharge Ghulam Nabi Azad on YS Jagan camp MLAs.