జగన్ వర్గంపై వేటుకు రంగం సిద్ధం, విప్ కొండ్రు బిజీ బిజీ

By Srinivas

Published: Monday, December 12, 2011, 13:29 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి వర్గం ఎమ్మెల్యేలపై వేటు వేసేందుకు కాంగ్రెసు పార్టీ రంగం సిద్ధం చేస్తోంది. ప్రభుత్వ విప్ కొండ్రు మురళి సోమవారం బిజీ బిజీగా గడుపుతున్నారు. అయన స్పీకర్ నాదెండ్ల మనోహర్, ముఖ్యమంత్రి కిరణ్ కుమార్ రెడ్డితో భేటీ అయ్యారు. స్పీకర్‌తో భేటీ అయి ప్రభుత్వానికి వ్యతిరేకంగా ఓటు వేసిన ఎమ్మెల్యేల అనర్హత పిటిషన్ వేసే అంశంపై చర్చించినట్లుగా తెలుస్తోంది.

అనంతరం కొండ్రు మీడియాతో మాట్లాడారు. ముఖ్యమంత్రి కిరణ్ కుమార్ రెడ్డితో సమావేశమయ్యాక వేటు వేసే అంశంపై నిర్ణయం తీసుకుంటామని చెప్పారు. ఆ తర్వాత ఆయన సిఎంతో భేటీ అయ్యారు. ఎమ్మెల్యేలపై చర్యలు తీసుకునే అంశంపై పూర్తిగా చర్చించినట్లు తెలుస్తోంది. సిఎం సూచనల మేరకు దాదాపు ఈరోజే ఎమ్మెల్యేలపై స్పీకర్‌కు కొండ్రు ఫిర్యాదు చేసే అవకాశాలు కనిపిస్తున్నాయి. మరోవైపు
ఎమ్మెల్సీలపై ఈ నెల 18వ తేది తర్వాత శాసనమండలి చైర్మన్‌కు ఫిర్యాదు చేసే అవకాశాలు కనిపిస్తున్నాయి.

Published On December 12, 2011