చిరుకు గౌరవం, తెలంగాణకు పరిష్కారం: బొత్స వ్యాఖ్య

By Srinivas

Published: Thursday, December 15, 2011, 15:31 [IST]

న్యూఢిల్లీ: తిరుపతి శాసనసభ్యుడు చిరంజీవికి పార్టీలో అందరికంటే మిన్నగా గౌరవం ఉంటుందని ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ గురువారం ఓ టీవీ ఛానల్ ఇంటర్వ్యూలో అన్నారు. చిరంజీవికి సోనియా గాంధీ నాయకత్వంపై నమ్మకం ఉండే తన పార్టీని విలీనం చేశారన్నారు. అలాగే చిరు పైన సోనియాకు, కాంగ్రెసుకు గౌరవం ఉందన్నారు. వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి వర్గం ఎమ్మెల్యేలపై వేటు వేయాలని ఇప్పటికే స్పీకర్‌కు ఫిర్యాదు చేశామన్నారు.

ఉప ఎన్నికల్లో 24 సీట్లలో సాధ్యమైనన్ని సీట్లు గెలుచుకునేందుకు ప్రయత్నిస్తామన్నారు. ప్రచారంలో తాను, ముఖ్యమంత్రి కిరణ్ కుమార్ రెడ్డి, చిరంజీవి పాల్గొంటారని చెప్పారు. అన్నీ స్థానాల్లోనూ పోటీ చేస్తామని చెప్పారు. తెలంగాణపై శాశ్వత పరిష్కార దిశగా అధిష్టానం ఆలోచిస్తుందన్నారు. సాధ్యమైనంత త్వరగా ఇరు ప్రాంతాలకు ఇబ్బంది లేని పరిష్కారాన్ని అధిష్టానం సూచిస్తుందని ఆయన అభిప్రాయపడ్డారు.

కాగా బొత్స రెండు రోజుల క్రితం న్యూఢిల్లీ వెళ్లిన విషయం తెలిసిందే. ఆయన ఏఐసిసి అధ్యక్షురాలు సోనియా గాంధీ, రాష్ట్ర వ్యవహారాల ఇంచార్జ్ గులాం నబీ ఆజాద్ తదితర నేతలతో భేటీ అయ్యారు. రాష్ట్ర రాజకీయ పరిణామాలపై చర్చించారు.

Published On December 15, 2011