శంకర్ దాదా ఎంబిబిఎస్: శంకర రావుపై రఘువీర గానం

By Srinivas

Published: Thursday, December 15, 2011, 16:43 [IST]

హైదరాబాద్: జూబ్హీహాల్‌లో జరుగుతున్న కలెక్టర్ల సమావేశంలో గురువారం ఆసక్తికర సన్నివేశాలు చోటు చేసుకుంటున్నాయి. భోజన విరామ సమయంలో లంచ్ చేసిన అనంతరం మంత్రులు శంకర రావు, రఘువీరా రెడ్డి, శైలజానాథ్, బస్వరాజు సారయ్య ఒక్కచోటకు వచ్చారు. అందరూ కలిసి మాట్లాడుకుంటున్నారు. ఆ సమయంలో రఘువీరా శంకర రావును ఉద్దేశించి శంకర్ దాదా ఎంబిబిఎస్ అంటూ పాట అందుకున్నారు. దాంతో అక్కడ నవ్వులు విరిశాయి. నలుగురు మంత్రులు అప్యాయంగా పలకరించుకుంటూ ఒకరిపై మరొకరు చేతులు వేసుకొని ఫోజులు ఇచ్చారు.

మరోవైపు కలెక్టర్ల సమావేశంలో లా అండ్ ఆర్డర్ పై చర్చ వచ్చినప్పుడు మంత్రులలో ప్రోటోకాల్ అసంతృప్తి రగిలింది. శాంతిభద్రతల చర్చ జరిగేటప్పుడు కేవలం హోంమంత్రి సబితా ఇంద్రా రెడ్డి మాత్రమే ఉండాలని సిఎం పురమాయించి మిగతా మంత్రులను బయటకు పంపించారు. తమను బయటకు పంపించడంపై మంత్రులు అసంతృప్తి వ్యక్తం చేసినట్లుగా సమాచారం. జూబ్లీహాల్ నుండి బయటకు వచ్చిన మంత్రులు ఏం చేయాలో పాలుపోక అటు ఇటు తిరుగుతూ కాలక్షేపం చేశారు.

Published On December 15, 2011