సోనియా గాంధీ హామీ ఇచ్చింది కాబట్టే: కె కేశవ రావు

By Srinivas

Published: Sunday, December 18, 2011, 11:36 [IST]

హైదరాబాద్: ఏఐసిసి అధ్యక్షురాలు సోనియా గాంధీ హామీ ఇచ్చారు కాబట్టే కాంగ్రెసు పార్టీ తెలంగాణ ఇస్తుందని తాము ఇంకా విశ్వసిస్తున్నామని కాంగ్రెసు పార్టీ సీనియర్ నేత కె కేశవ రావు ఆదివారం తన నివాసంలో ఏర్పాటు చేసిన మీడియా సమావేశంలో అన్నారు. రాష్ట్రాల పునర్వ్యవస్థీకరణ అవసరం లేదని తాము ఎప్పుడో చెప్పామన్నారు. తెలంగాణపై అన్నీ తెలిసే కేంద్ర హోంమంత్రి చిదంబరం 2009 డిసెంబర్ 9న పార్లమెంటులో ప్రకటన చేశారని చెప్పారు. పార్లమెంటులో శీతాకాల సమావేశాల్లో తెలంగాణ బిల్లు పెట్టక పోవడంపై తాను సిగ్గుతో తలదించుకుంటున్నానన్నారు. తెలంగాణపై చర్చ జరగకుండానే రాజ్యసభ వాయిదా పడటం తనను తీవ్రంగా కలిచి వేసిందన్నారు. చర్చ జరగకుండా సభ వాయిదా పడినంత మాత్రాన వచ్చే నష్టమేమీ లేదన్నారు.

తెలంగాణ కోసం అన్ని మార్గాల్లో కేంద్రంపై ఒత్తిడి తీసుకు వస్తామన్నారు. రెండో ఎస్సార్సీ, అభివృద్ధి మండలి కేవలం ఊహాగానాలేనని, రాష్ట్రం తప్ప తెలంగాణ ప్రజలు దేనిని ఒప్పుకునే ప్రసక్తి లేదన్నారు. తాము నిత్యం అధిష్టానంతో టచ్‌లో ఉన్నామని చెప్పారు. తెలంగాణ కాంగ్రెసు నేతలమంతా ఏకత్రాటిపై ఉన్నామని, మా మధ్య ఎలాంటి అభిప్రాయబేధాలు లేవన్నారు.

Published On December 18, 2011