తుఫాన్‌ను ఆపే శక్తి ఎవరికీ లేదు: మంత్రి రఘువీరా

హైదరాబాద్: తుఫానును ఆపే శక్తి ఎవ్వరికీ లేదని మంత్రి రఘువీరా రెడ్డి బుధవారం అన్నారు. అయితే తుఫాను పట్ల ప్రభుత్వం అప్రమత్తంగా ఉందని చెప్పారు. ప్రభుత్వం చేస్తున్న సహాయక చర్యలకు ప్రజలు సహకరించాలని విజ్ఞప్తి చేశారు. తుఫాను దృష్ట్యా భక్తులు తిరుమల యాత్రను వాయిదా వేసుకోవాలని సూచించారు. ప్రభుత్వం చెప్పే వరకు మత్స్యకారులు ఎవరూ వేటకు వెళ్లవద్దన్నారు. సహాయక చర్యలు మరింత ముమ్మరం చేసేందుకు ఎండిఆర్ఎం ఫోర్సును పంపించాలని కేంద్రాన్ని కోరినట్లు చెప్పారు. తుఫాను ప్రభావిత ప్రాంతాల్లో రెండు లక్షల ఎకరాల్లో పంట కోతకు ఉందని, రైతులు దానిని రక్షించుకునే ప్రయత్నాలు చేయాలన్నారు. ప్రభుత్వం వారికి అండగా ఉంటుందని చెప్పారు. చిత్తూరు, నెల్లూరు, ప్రకాశం జిల్లాలు అప్రమత్తంగా ఉండాలన్నారు.

తుఫాను దృష్ట్యా ప్రభుత్వం ముందస్తు ఏర్పాట్లు చేసిందని మరో మంత్రి ఆనం రామనారాయణ రెడ్డి వేరుగా అన్నారు. నిత్యావసర వస్తువులు ఏర్పాటు చేసినట్లు చెప్పారు. కాగా సముద్రంలో చిక్కుకున్న మత్స్యకారులను చాలామందిని ఇప్పటికే ఒడ్డుకు చేర్చామని, సహాయక చర్యలు చేపడుతున్నామని తూర్పు గోదావరి జిల్లా కలెక్టర్ రవిచంద్ర చెప్పారు. కాగా బంగాళాఖాతంలో థేన్ తుఫాను కొనసాగుతోంది. శుక్రవారం ఉదయం తుఫాన్ తీరం దాటే అవకాశముంది.

English summary

Minister Raghuveera Reddy said that no one can stop Thane Cyclone.