కెసిఆర్ మా ఉత్తరాంధ్రవాడే, గర్వంగా ఉంది: దాడి

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు తమ ఉత్తరాంధ్ర ప్రాంతానికి చెందినవారేనని, తమ ప్రాంతంవాడు తెలంగాణ ఉద్యమం నడిపించడం గర్వంగా ఉందని తెలుగుదేశం పార్టీ నాయకుడు దాడి వీరభద్ర రావు చమత్కరించారు. కెసిఆర్ తమ విజయనగరం జిల్లాకు చెందినవారని, తమ ప్రాంతం నాయకుడు తెలంగాణలో పెద్ద యెత్తున ఉద్యమం నడపుతున్నందుకు గర్వపడుతున్నామని ఆయన గురువారం మీడియా ప్రతినిధుల సమావేశంలో అన్నారు. తమ ప్రాంతానికి చెందిన కెసిఆర్‌ను తమ పార్టీకి చెందిన మోత్కుపల్లి నర్సింహులు వంటి నాయకులు ఇబ్బంది పెట్టడం విచారకరమని ఆయన అన్నారు.

కెసిఆర్ సీమాంధ్రకు చెందినవారని, కెసిఆర్ పూర్వీకులది విజయనగర జిల్లా అని తెలుగుదేశం పార్టీ నాయకుడు మోత్కుపల్లి నర్సింహులు అన్నారు. తెలంగాణ ప్రజలను కెసిఆర్ మోసం చేస్తున్నారని ఆయన వరుస విమర్శలు చేస్తున్నారు. తెలంగాణ ఉద్యమం పేరు చెప్పి ప్రయోజనాలు పొందుతున్నారని ఆయన అంటున్నారు. తెలంగాణలో విద్యార్థుల ఆత్మహత్యలకు కెసిఆర్ కారణమని ఆయన ధ్వజమెత్తుతున్నారు. తెలంగాణ రాష్ట్ర ఏర్పాటుకు కెసిఆర్ వ్యతిరేకంగా పనిచేస్తున్నారని ఆయన విమర్శిస్తున్నారు.

English summary

TDP seemandhra leader Dadi Veerabhadra Rao said that he is proud of TRS president K Chandrasekhar Rao.