చంద్రబాబుకు సిగ్గు లేదు: కల్వకుంట్ల కవిత వ్యాఖ్య

By Pratap

Published: Saturday, January 7, 2012, 16:34 [IST]

హైదరాబాద్: తమ ఊరికి రావద్దని ప్రజలు బ్యానర్లు కట్టినా పంతం పట్టి తెలుగుదేశం పార్టీ అధ్యక్షుడు నారా చంద్రబాబు నాయుడు సిగ్గు లేకుండా వెళ్లారని తెలంగాణ జాగృతి అధ్యక్షురాలు, తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు కూతురు కల్వకుంట్ల కవిత అన్నారు. చంద్రబాబు పాలకుర్తిలో బహిరంగ సభ నిర్వహించడాన్ని ఆమె తప్పు పట్టారు. తమ ఊరికి రావద్దని ప్రజలు ముఖం చెప్పినా చంద్రబాబుకు సిగ్గు లేదని ఆమె శనివారం మీడియా ప్రతినిధుల సమావేశంలో అన్నారు. తెలుగుదేశం తెలంగాణ ఫోరం పేరుకు మాత్రమే ఉందని, ఆ ఫోరం నాయకులకు తెలంగాణవాదం లేదని ఆమె అన్నారు. చంద్రబాబుకు, సీమాంధ్ర నాయకులకు వారు గులాంగిరీ చేస్తున్నారని ఆమె అన్నారు. వద్దని చెప్పినా చంద్రబాబు వెళ్లడం ఏం సంస్కృతో తమకు అర్థం కావడం లేదని ఆమె అన్నారు.

రైతు పోరు బాటు పేరుతో చేపట్టిన కార్యక్రమాన్ని తెలుగుదేశం నాయకులు తమ పార్టీ అధ్యక్షుడు కెసిఆర్‌ను, తెలంగాణ జెఎసి నాయకుడు కోదండరామ్‌ను తిట్టడానికే వాడుకున్నారని తెరాస శాసనసభా పక్ష నేత ఈటెల రాజేందర్ అన్నారు. చంద్రబాబు తెలంగాణవాదుల రక్తం కళ్ల చూశారని ఆయన అన్నారు. తెలుగుదేశం తెలంగాణ నాయకులు ఆంధ్ర నాయకుల కాళ్ల వద్ద తెలంగాణ ఆత్మగౌరవాన్ని తాకట్టు పెట్టారని ఆయన వ్యాఖ్యానించారు. పాలకుర్తిలో కాకుండా హైదరాబాదులో తెలుగుదేశం పార్టీ బహిరంగ సభ పెట్టుకుంటే ఏమైనా పోయేదా అని ఆయన అడిగారు.

Published On January 7, 2012