ప్రత్యేక సెల్ కేటాయించాలన్న విజయ సాయి రెడ్డి

By Srinivas

Published: Wednesday, January 11, 2012, 12:22 [IST]

హైదరాబాద్: తనకు జైలులో ప్రత్యేక సెల్ కేటాయించాలని వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి ఆస్తుల కేసులో అరెస్టైన జగతి పబ్లికేషన్ వైస్ చైర్మన్ విజయ సాయి రెడ్డి బుధవారం సిబిఐ ప్రత్యేక న్యాయస్థానంలో పిటిషన్ వేశారు. ఆయన పిటిషన్ స్వీకరించిన కోర్టు విచారణను ఈ నెల 17వ తేదికి వాయిదా వేసింది. కాగా విజయ సాయిని మొదట ఐదు రోజుల పాటు సిబిఐ కస్టడికీ అప్పగించిన కోర్టు, సిబిఐ పిటిషన్ మేరకు మరో వారం రోజులు పొడిగించిన విషయం తెలిసిందే. ఆయనను పదిహేడవ తేది వరకు సిబిఐ కస్టడీకి అప్పగించింది. దీంతో మరో వారం రోజుల పాటు విజయ సాయి రెడ్డి ఉదయం పది గంటల నుండి సాయంత్రం ఐదు గంటల మధ్య సిబిఐ విచారణ ఎదుర్కోవాల్సి ఉంటుంది.

బుధవారం ఉదయం తొమ్మిదిన్నర గంటల ప్రాంతంలో సిబిఐ అధికారులు చంచల్ గూడ జైలు నుండి విజయ సాయి రెడ్డిని సిబిఐ కార్యాలయానికి తీసుకు వెళ్లారు. వారం రోజులుగా ఆయనను సిబిఐ జగన్ ఆస్తులపై విచారిస్తోంది. మొదటిసారి కస్టడీకి అప్పగించిన మొదటి ఐదు రోజులలో మూడు రోజులు ఆయన ఏమాత్రం సహకరించలేదని, రెండు రోజులు మాత్రం కొంత సమాచారం సేకరించామని చెప్పిన విషయం తెలిసిందే.

Published On January 11, 2012