జైళ్లో గాలి పుట్టిన రోజు వేడుకలు, కలిసిన శ్రీరాములు

By Srinivas

Published: Wednesday, January 11, 2012, 14:03 [IST]

హైదరాబాద్: కర్నాటక మాజీ మంత్రి గాలి జనార్ధన్ రెడ్డి బుధవారం తన పుట్టిన రోజును చంచల్‌గూడ జైలులోనే జరుపుకున్నారు. ప్రతి యేటా కుటుంబ సభ్యులు, పార్టీ నాయకులు, కార్యకర్తల మధ్య ఎంతో ఆర్భాటంగా అలయానికి వెళ్లి ప్రత్యేక పూజలు నిర్వహించి జన్మదిన వేడుకలు జరుపుకునే గాలి ఈసారి మాత్రం జైల్లోనే జరుపుకున్నారు. కర్నాటక మాజీ మంత్రి, బళ్లారి రూరల్ శాసనసభ్యుడు శ్రీరాములు ఆయనను జైల్లో కలిసి పుట్టిన రోజు శుభాకాంక్షలు తెలిపారు. చాలామంది గాలి అభిమానులు జైలుకు తరలి వచ్చారు. మంగళవారమే బళ్లారి నుండి చాలామంది అభిమానులు తరలి వచ్చినప్పటికీ వారిని లోపలకు అనుమతించలేదు. జైలులోని దేవాలయంలో పూజలు చేసిన గాలి ఆ తర్వాత నిరాడంబరంగా వేడుకలు జరుపుకున్నారు.

కాగా ఓబుళాపురం మైనింగ్ కేసులో అరెస్టైన గాలి నాలుగుసార్లు బెయిల్ కోసం పిటిషన్ దాఖలు చేసుకున్నప్పటికీ బెయిల్ రాలేదు. ఆయన మరోసారి దాఖలు చేసిన పిటిషన్‌పై విచారణ ఈ నెల 23వ తేదికి వాయిదా పడింది. ఓఎంసి కేసులో ఎ-1 నిందితుడిగా ఉన్న గాలి జనార్ధన్ రెడ్డికి బెయిల్ ఇస్తే సాక్షులను బెదిరించి సాక్ష్యాధారాలు తారుమారు చేసే అవకాశముందని సిబిఐ వాదిస్తోంది. దీంతో గాలికి కోర్టు బెయిల్ నిరాకరిస్తూ వస్తోంది. అయితే మరోసారి పరీక్షించుకునేందుకు గాలి వేసిన పిటిషన్ 23కు వాయిదా పడింది.

Published On January 11, 2012