చిరంజీవిపై బాలకృష్ణ వ్యాఖ్యల్లో తప్పేంటి?: టిడిపి ప్రశ్న

By Srinivas

Published: Thursday, January 12, 2012, 16:41 [IST]

హైదరాబాద్: తిరుపతి శాసనసభ్యుడు, కాంగ్రెసు నేత చిరంజీవిపై హీరో బాలకృష్ణ చేసిన వ్యాఖ్యల్లో తప్పేమిటో చెప్పాలని తెలుగుదేశం పార్టీ గురువారం ప్రశ్నించింది. ఎన్టీఆర్ ట్రస్టు భవనంలో ఏర్పాటు చేసిన మీడియా సమావేశంలో ఎమ్మెల్సీ రాజేంద్ర ప్రసాద్ మాట్లాడారు. సామాజిక న్యాయం పేరుతో వచ్చిన చిరంజీవి దానిని విస్మరించి తన ప్రజారాజ్యం పార్టీని కాంగ్రెసులో కలిపారన్నారు. నిజామాబాద్ జిల్లాలోని ఆర్మూర్‌లో వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి చేస్తున్న దీక్ష ద్వారా టిఆర్ఎస్ అధ్యక్షుడు కె చంద్రశేఖర రావుకు, ఆయనకు మధ్య ఉన్న ఫిక్సింగ్ బయటపడిందన్నారు. తమ పార్టీ అధినేత నారా చంద్రబాబు నాయుడును విమర్శించే అర్హత ఐటి శాఖ మంత్రి పొన్నాల లక్ష్మయ్యకు లేదన్నారు. పొన్నాల జలయజ్ఞాన్ని ధనయజ్ఞంగా మార్చారన్నారు. ఆయన సవాల్‌కు తాము సిద్ధమన్నారు.

విశాఖ ఏజెన్సీలో బాక్సైట్ గనుల తవ్వకాలపై ప్రభుత్వం, మంత్రులు, కేంద్ర మంత్రులు తలోమాట మాట్లాడుతున్నారని దీనిపై రాష్ట్ర ప్రభుత్వం తన వైఖరి స్పష్టం చేయాలని టిడిపి నేత పుష్పరాజ్ వేరుగా డిమాండ్ చేశారు. అటవీ చట్టాలను ప్రజాభిప్రాయ సేకరణను పట్టించుకోకుండా ప్రభుత్వం బాక్సైట్ గనులను ప్రైవేట్ కంపనీలకు అప్పగించడానికి చూస్తోందన్నారు. గవర్నర్ తన విశేషాధికారాలను ఉపయోగించి ఈ మైనింగ్ లైసెన్సులన్నీ రద్దు చేయాలన్నారు. గిరిజనుల ప్రయోజనాలను ప్రభుత్వం పణంగా పెడుతోందన్నారు.

Published On January 12, 2012