వైయస్ జగన్ ఆర్మూర్ దీక్ష విఫలం: పొన్నం ప్రభాకర్

By Pratap

Published: Thursday, January 12, 2012, 19:48 [IST]

హైదరాబాద్: నిజామాబాద్ జిల్లా ఆర్మూర్‌లో వైయస్సార్ కాంగ్రెసు పార్టీ అధ్యక్షుడు వైయస్ జగన్ చేపట్టిన రైతు దీక్ష విఫలమైందని తెలంగాణ ప్రాంతానికి చెందిన కాంగ్రెసు పార్లమెంటు సభ్యుడు పొన్నం ప్రభాకర్ అన్నారు. రాజకీయ ప్రయోజనాల కోసమే తెలుగుదేశం పార్టీ అధ్యక్షుడు నారా చంద్రబాబు నాయుడు, జగన్ తెలంగాణపై దండయాత్రలు చేస్తున్నారని ఆయన గురువారం మీడియా ప్రతినిధులతో అన్నారు. పర్యటనలను తాము తప్పు పట్టడం లేదని, తెలంగాణ అంశంపై వారు తమ అభిప్రాయాలు చెప్పాలన్నదే తమ ఉద్దేశ్యమని ఆయన అన్నారు. ఉనికి కోసమే తెలుగుదేశం తెలంగాణ ఫోరం ప్రాణహిత - చేవెళ్ల యాత్ర చేపట్టిందని ఆయన అన్నారు.

తెలంగాణ ప్రాంత ప్రజాప్రతినిధులపై వివక్ష ప్రదర్శిస్తున్నారని ఆయన విమర్శించారు. విశాఖపట్నంలో నిర్వహించిన శాసనసభ్యుల అవగాహనా కార్యక్రమానికిక శాసనసభా వ్యవహారాల మంత్రి శ్రీధర్ బాబును ఎందుకు ఆహ్వానించలేదని ఆయన అడిగారు. మంత్రి కాసు వెంకట కృష్ణారెడ్డి అనారోగ్యంతో బాధపడుతుంటే పరామర్శించిన ముఖ్యమంత్రి కిరణ్ కుమార్ రెడ్డి మంత్రి శంకరరావుపై దాడి జరిగితే ఎందుకు స్పందించలేదని ఆయన ప్రశ్నించారు. అభివృద్ధి చెందిన విశాఖలో అవగాహనా కార్యక్రమం పెట్టి కోట్ల నిధులు కుమ్మరించే బదులు వెనకబడిన ఆదిలాబాద్‌లో ఈ కార్యక్రమం ఎందుకు చేపట్టలేదని ఆయన అడిగారు.

Published On January 12, 2012