'నమస్తే తెలంగాణ' రాజం భేటీతో సంబంధంలేదు: ఈటెల

By Srinivas

Published: Thursday, January 19, 2012, 18:22 [IST]

హైదరాబాద్: రాష్ట్ర మంత్రివర్గ విస్తరణలో తెలంగాణ ప్రాంతానికి అన్యాయం జరిగిందని తెలంగాణ రాష్ట్ర సమితి శాసనసభా పక్ష నేత ఈటెల రాజేందర్ గురువారం అన్నారు. విస్తరణలో కిరణ్ కుమార్ రెడ్డి మంత్రివర్గంలో ఒక్క తెలంగాణ ప్రాంత నేతకు మంత్రి పదవి రాలేదని, ఇప్పటికైనా తెలంగాణ కాంగ్రెసు నేతలు కళ్లు తెరవాలని సూచించారు. తెలంగాణకు జరుగుతున్న అన్యాయానికి ఇది పరాకాష్ఠ అన్నారు. తెలంగాణ ప్రాంతం నుండి మూడు మంత్రి పదవులు ఖాళీ అయితే ఇక్కడి ఒక్క నేతకు ఇవ్వక పోవడం ఎంత వరకు సమంజసమన్నారు. న్యాయమైన వాటా అంటున్న నేతలు ఎప్పుడు ఇస్తారన్నారు. తెలుగుదేశం పార్టీ గుంటనక్క ప్రచారాన్ని తెలంగాణ ప్రజలు నమ్మరన్నారు. సమయం వచ్చినప్పుడు ప్రజలే వారి భరతం పడతారన్నారు. చంద్రబాబు నాయుడు తాయిలాలకు ఆశపడే టిడిపి తెలంగాణ ఫోరం నేతలు తమపై విమర్శలు చేస్తున్నారన్నారు.

నమస్తే తెలంగాణ పత్రిక యజమాని రాజం కేంద్రమంత్రి, రాష్ట్ర వ్యవహారాల ఇంఛార్జ్‌ గులాం నబీ ఆజాద్‌ను కలవడంలో తమకు ఎలాంటి సంబంధం లేదన్నారు. నిధుల కొరత కారణంగా ఆ పత్రికను అమ్మి వేసినట్లు ఈటెల చెప్పారని తెలుస్తోంది. కాగా బుధవారం ఢిల్లీలో రాజం ఆజాద్‌ను కలిసినట్లు వార్తలు వచ్చిన విషయం తెలిసిందే. ముఖ్యమంత్రి కిరణ్ కుమార్ రెడ్డి, ఆజాద్‌ను ఆయన నివాసంలో కలిసిన సమయంలో రాజం అదే ప్రాంగణంలో ఉన్నారు.

Published On January 19, 2012