ఒకే ఇంట్లో నాలుగు పదవులు: బొత్సపై గాదె వ్యాఖ్య

By Pratap

Published: Saturday, January 21, 2012, 13:12 [IST]

గుంటూరు: తమ కాంగ్రెసు పార్టీకి చెందిన ఓ కీలక నాయకుడికి చెందిన ఒకే ఇంట్లో నాలుగు పదవులు ఉన్నాయని మాజీ మంత్రి, సీనియర్ శాసనసభ్యుడు గాదె వెంకటరెడ్డి వ్యాఖ్యానించారు. ప్రదేశ్ కాంగ్రెసు పార్టీ (పిసిసి) అధ్యక్షుడు బొత్స సత్యనారాయణను దృష్టిలో పెట్టుకునే ఆయన ఆ వ్యాఖ్యలు చేసినట్లు భావిస్తున్నారు. తనకు మంత్రి పదవి ఇవ్వకపోవడం ఆయన శనివారం మీడియా ప్రతినిధుల సమావేశంలో తీవ్ర అసంతృప్తి వ్యక్తం చేశారు. తనకు మంత్రి పదవి ఇచ్చే విషయంలో తన వియ్యంకుడు డిఎల్ రవీంద్రా రెడ్డిని చూపుతున్నారని, మంత్రి డిఎల్ రవీంద్రారెడ్డిని చూపి తనకు మంత్రి పదవి ఇవ్వడానికి నిరాకరిస్తున్నారని ఆయన అన్నారు. పార్టీకి చెందిన కీలక వ్యక్తి ఇంట్లోనే నాలుగు పదవులు ఉన్నప్పుడు డిఎల్ రవీంద్రా రెడ్డితో తన పదవికి ముడి పెట్టడం సరి కాదని ఆయన అన్నారు.

శానససభలో ఏకైక సీనియర్‌ను తానే అని ఆయన చెప్పుకున్నారు. మంత్రి పదవుల విషయంలో తెలంగాణకు అన్యాయం జరిగిందని ఆయన అభిప్రాయపడ్డారు. కాపులకు మంత్రి పదవులు ఇచ్చి తెలంగాణవారికి ఇవ్వకపోవడం న్యాయం కాదని ఆయన అన్నారు. తెలంగాణవారికి రెండు మంత్రి పదవులు ఇవ్వాల్సి ఉందని ఆయన అన్నారు. సమైక్యవాది అయిన గాదె వెంకటరెడ్డి తెలంగాణకు జరిగిన అన్యాయంపై నోరు విప్పడాన్ని గమనించాల్సిన అవసరం ఉంది.

Published On January 21, 2012