కిరణ్ రెడ్డి ప్రభుత్వంపై సభాహక్కుల నోటీస్: ఎర్రబెల్లి

By Srinivas

Published: Monday, January 23, 2012, 16:15 [IST]

హైదరాబాద్: ముఖ్యమంత్రి కిరణ్ కుమార్ రెడ్డి ప్రభుత్వంపై తాము సభా హక్కుల నోటీసు ఇస్తామని తెలుగుదేశం పార్టీ తెలంగాణ ఫోరం నేతలు సోమవారం చెప్పారు. ఫోరం నేతలు ఎర్రబెల్లి దయాకర రావు, రేవంత్ రెడ్డి తదితరులు ఉదయం ఎన్టీఆర్ ట్రస్ట్ భవన్‌లో సమావేశమయ్యారు. అనంతరం వారు మీడియాతో మాట్లాడారు. విద్యార్థులపై కేసులు ఎత్తివేస్తామని అసెంబ్లీలో హామీ ఇచ్చిన ప్రభుత్వం ఇప్పటి వరకు నిలబెట్టుకోలేదని అందుకు తాము సభా హక్కుల ఉల్లంఘన నోటీసు ఇస్తామన్నారు. ఇప్పటికైనా విద్యార్థులపై వెంటనే కేసులు ఎత్తి వేయాలని డిమాండ్ చేశారు. వచ్చే బడ్జెట్ సమావేశాల్లో విద్యార్థులపై కేసుల ఎత్తివేతే తమ ప్రధాన అజెండా అన్నారు. అలాగే సకల జనుల సమ్మెలో పాల్గొన్న ఉద్యోగులకు ఇచ్చిన హామీలు నెరవేర్చాలని డిమాండ్ చేశారు. ఉద్యోగుల సమస్యలు పరిష్కరించే వరకు ఉద్యమిస్తామన్నారు.

తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు నమస్తే తెలంగాణ పత్రిక తెలంగాణ గుండె చప్పుడు అని చెప్పారని కానీ దానిని ఆ తర్వాత అమ్మేశారని విమర్శించారు. రేపు తెలంగాణ సెంటిమెంట్ కూడా మరోసారి అమ్ముకుంటారని ధ్వజమెత్తారు. ప్రాణహిత చేవేళ్ల కోసం దివంగత ముఖ్యమంత్రి వైయస్ రాజశేఖర రెడ్డి శంఖుస్థాపన చేసిన చోట నిరసనలు తెలియజేస్తామన్నారు. ప్రాణహిత ప్రాజెక్టుకు జాతీయ హోదా కల్పించాలని డిమాండ్ చేశారు. రాష్ట్ర ప్రభుత్వం మోసపూరిత విధానాలపై పోరాటం చేస్తామన్నారు.

Published On January 23, 2012