నా స్థాయికి బాలయ్య తగరు, అంతా తెలుసు: బొత్స

By Srinivas

Published: Tuesday, January 24, 2012, 14:42 [IST]

హైదరాబాద్: హీరో నందమూరి బాలకృష్ణ ప్రచారం చేస్తే ఏం జరిగిందో అందరికీ తెలుసునని ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ మంగళవారం అన్నారు. గత 2009 ఎన్నికల్లో బాలకృష్ణ తెలుగుదేశం పార్టీ తరఫున ప్రచారం చేశారని అప్పుడు ఏం జరిగిందో తెలుసు కదా అన్నారు. బాలకృష్ణ మొదట తన బావ చంద్రబాబు అక్రమాలపై మాట్లాడాలన్నారు. బాబు వెన్నుపోటు గుర్తుకు లేదా అని ప్రశ్నించారు. ఆయన ఏదేదో మాట్లాడుతున్నారని విమర్శించారు. ఐనా బాలయ్య వ్యాఖ్యలపై నా స్థాయిలో స్పందించడం సరికాదన్నారు. తెలుగుదేశం ఓ కుటుంబానికి చెందిన పార్టీ అని ఆరోపించారు. కాంగ్రెసు పార్టీ నుండి వ్యక్తులు దూరమవుతున్నారు కానీ వర్గాలు దూరం కావడం లేదన్నారు. అన్ని వర్గాలకు పార్టీలో న్యాయం జరుగుతుందన్నారు. ఏ వర్గాన్ని కాంగ్రెసు వదులుకోదన్నారు. అమలాపురంలో రాజ్యాంగ నిర్మాత అంబేడ్కర్ విగ్రహాల ధ్వంసం ఖండిస్తున్నట్లు చెప్పారు.

ఇలాంటి ఘటనలు పునరావృతం కాకుండా చూస్తామన్నారు. బాధ్యులను తప్పకుండా కఠినంగా శిక్షిస్తామని చెప్పారు. ఈ ఘటనపై అందరూ సంయమనం పాటించాలని సూచించారు. అమలాపురం పార్లమెంటు సభ్యుడు హర్షకుమార్ వ్యాఖ్యలపై ఆరా తీస్తున్నామని, ఆయనను వివరణ అడుగుతున్నామని చెప్పారు. టిడిపి కేంద్రమంత్రి, రాష్ట్ర వ్యవహారాల ఇంచార్జ్ గులాం నబీ ఆజాద్‌పై వ్యక్తిగత విమర్శలకు దిగటం సరికాదన్నారు. గాంధీ భవనంలో జరిగింది మా పార్టీ సమావేశమని, దానిపై మాట్లాడే అర్హత ఆ పార్టీకి లేదన్నారు. ముఖ్యమంత్రి కిరణ్ కుమార్ రెడ్డి, ఉప ముఖ్యమంత్రి దామోదర రాజనర్సింహల మధ్య ఎలాంటి విభేదాలు లేవన్నారు. దామోదర పార్టీ ఉన్నతికి కృషి చేస్తున్నారన్నారు.

Published On January 24, 2012