చేతులు కలిపిన సిఎం కిరణ్, డిప్యూటీ సిఎం దామోదర

హైదరాబాద్‌: ముఖ్యమంత్రి కిరణ్ కుమార్ రెడ్డి ఉప ముఖ్యమంత్రి దామోదర రాజనర్సింహ చేతులు కలిపారు. గత కొద్ది కాలంగా వారిద్దరి మధ్య పచ్చగడ్డి వేస్తే భగ్గుమంటోందనే వార్తలు వచ్చిన విషయం తెలిసిందే. ఆ మధ్య జరిగిన సమన్వయ కమిటీ సమావేశంలో కాంగ్రెసు ఆంధ్రప్రదేశ్ వ్యవహారాల ఇంచార్జీ గులం నబీ ఆజాద్ సమక్షంలో కిరణ్ కుమార్ రెడ్డిని దామోదర రాజనర్సింహ ఉతికి ఆరేశారు. ఈ స్థితిలో వారిద్దరి మధ్య సోమవారం సచివాలయంలో జరిగిన భేటీ ప్రాముఖ్యాన్ని సంతరించుకుంది. తాజా రాజకీయ అంశాలు వారిద్దరి మధ్య చర్చకు వచ్చినట్లు తెలుస్తోంది. వైయస్సార్ కాంగ్రెసు పార్టీ అధ్యక్షుడు వైయస్ జగన్ వర్గానికి చెందిన శాసనసభ్యులపై అనర్హత వేటుపై, ఉప ఎన్నికలపై వారిద్దరి మధ్య సుదీర్ఘ చర్చలు జరిగినట్లు తెలుస్తోంది. తాను ముఖ్యమంత్రికి వ్యతిరేకంగా చేసినట్లు వచ్చిన వార్తలపై దామోదర రాజనర్సింహ వివరణ ఇచ్చినట్లు తెలుస్తోంది. ఆ తర్వాత కిరణ్ కుమార్ రెడ్డి అధ్యక్షతన మంత్రి వర్గ సమావేశం జరిగింది.

రాష్ట్ర ప్రభుత్వ ఉద్యోగుల డీఏని 5.99 శాతం పెంచడానికి మంత్రి మండలి ఆమోదం తెలిపింది. సోమవారం జరిగిన మంత్రివర్గ సమావేశంలో పలు నిర్ణయాలు తీసుకున్నారు. ప్రభుత్వ ఉద్యోగాల భర్తీకి మంత్రిమండలి ఆమోదం తెలిపింది. వ్యాట్‌ పెంపు ఆర్డినెన్స్‌కు ఆమోదం తెలిపారు. చిత్తూరు జిల్లాలో డిఆర్‌డిఏకు 11 ఎకరాలు, అనంతపురం జిల్లాలో బిడిఎల్‌ కంపెనీకి 44 ఎకరాలు, నెల్లూరులో శిల్పారామం ఏర్పాటుకు 7 ఎకరాలు కేటాయింఆరు. అంబేద్కర్‌ విగ్రహాల ధ్వంసంపై కూడా సమావేశంలో చర్చించారు. శాసనసభ ఆవరణలో అంబేడ్కర్ విగ్రహాన్ని స్థాపించాలని మంత్రి వర్గం నిర్ణయం తీసుకుంది. నెల్లూరులో శిల్పారామం ఏర్పాటు చేయాలని నిర్ణయం తీసుకుంది. స్థానిక సంస్థల ఎన్నికలకు సిద్ధం కావాలని కిరణ్ కుమార్ రెడ్డి మంత్రులకు సూచించారు. ఈ స్థితిలో వ్యాట్‌పై నిర్ణయం తీసుకోవడం మంచిది కాదని ఆయన అన్నారు.

ముఖ్యమంత్రి కిరణ్ కుమార్ రెడ్డి గవర్నర్ నర్సింహన్‌ను రాజభవన్‌లో కలిశారు. గవర్నర్‌గా మరో ఏడాది పాటు నరసింహన్ పదవీకాలాన్ని పొడగిస్తూ ఉత్తర్వులు జారీ అయ్యాయి. తెలంగాణ ఉద్యమ నేపథ్యంలో గవర్నర్‌గా వచ్చిన నరసింహన్ పదవీకాలాన్ని పొడగించడం చర్చనీయాంశంగా మారింది.

English summary

Deputy CM Damodara Rajanarasimha met CM Kiran kumar Reddy in secretariat.