అంబేడ్కర్ విగ్రహం వద్ద మోత్కుపల్లి ధర్నా, అరెస్టు

By Srinivas

Published: Monday, January 30, 2012, 12:20 [IST]

హైదరాబాద్: రాజ్యాంగ నిర్మాత అంబేడ్కర్ విగ్రహాల ధ్వంసాన్ని నిరసిస్తూ దళిత సంఘాలు ఇచ్చిన రాష్ట్ర వ్యాప్త బంద్ పిలుపులో భాగంగా తెలుగుదేశం పార్టీ నేత మోత్కుపల్లి నర్సింహులు ట్యాంక్ బండ్ వద్ద ఉన్న అంబేడ్కర్ విగ్రహం వద్ద ధర్నాలో పాల్గొన్నారు. టిడిపి ఆధ్వర్యంలో ఈ ఆందోళన నిర్వహించారు. విగ్రహాలను ధ్వంసం చేసిన వారిపై వెంటనే కఠిన చర్యలు తీసుకోవాలని డిమాండ్ చేశారు. ఆందోళన కారణంగా ట్యాంక్ బండ్ పరిసరాల్లో భారీగా ట్రాఫిక్ జాం అయింది. దీంతో పోలీసులు మోత్కుపల్లి నర్సింహులును అరెస్టు చేశారు. ఈ సందర్భంగా ఆయన మాట్లాడారు. అంబేడ్కర్ విగ్రహాలపై ప్రభుత్వమే దాడులు చేయిస్తోందని విమర్శించారు. రాష్ట్రం అగ్నిగుండంగా మారకముందే దోషులను కఠినంగా శిక్షించాలని డిమాండ్ చేశారు. దళితులకు ముఖ్యమంత్రి కిరణ్ కుమార్ రెడ్డి వెంటనే క్షమాపణ చెప్పాలన్నారు. ఈ ఘటనపై సిట్టింగ్ జడ్జితో విచారణ జరపాలన్నారు.

కాగా రాష్ట్రవ్యాప్తంగా అన్ని జిల్లాల్లో ఆందోళనలు, రాస్తారోకోలు నిర్వహిస్తున్నారు. దళిత సంఘాలకు పలు పార్టీలు మద్దతు పలికాయి. ధర్నాలో పార్టీల నేతలు కూడా పాల్గొన్నారు. ఒకటి రెండు మినహా విధ్వంస సంఘటనలు చోటు చేసుకోలేదు. హైదరాబాదు, కరీంనగర్ జిల్లాలో ఆందోళనకారులు బస్సులను కాల్చారు. రాష్ట్రంలోని పలు బస్సు డిపోల వద్ద దళిత సంఘాలు ఆందోళనకు దిగి రవాణాను అడ్డుకున్నాయి. అసెంబ్లీ ప్రాంగణంలో పలు పార్టీల నేతలు ఆందోళనకు దిగారు.

Published On January 30, 2012