ఒళ్లు దగ్గర పెట్టుకుంటాం: జీయర్ వ్యాఖ్యలపై కనుమూరి

By Srinivas

Published: Friday, February 3, 2012, 17:21 [IST]

చిత్తూరు: వెయ్యి కాళ్ల మండపం విషయంలో తొందరపడి నిర్ణయం తీసుకోలేమని, ఒళ్లు దగ్గర పెట్టుకొని పని చేస్తామని తిరుమల తిరుపతి దేవస్థానం చైర్మన్ కనుమూరి బాపిరాజు శుక్రవారం అన్నారు. ఉదయం చినజీయర్ స్వామి టిటిడి తీరుపై విరుచుకు పడిన విషయం తెలిసిందే. అందుకు కనుమూరి సానుకూలంగా స్పందించారు. తాను ఎప్పుడూ అహంభావంతో వ్యవహరించలేదన్నారు. తాను ఆశించకుండానే టిటిడి ఈవో పదవి లభించిందని అన్నారు. స్వామి వారికి తలవంచుకొని సేవ చేస్తానని అన్నారు. చినజీయర్ చేసిన ఆరోపణలపై టిటిడి పాలకమండలిలో చర్చిస్తామని అన్నారు. రాత్రి పది గంటలకే శ్రీవారి గుడి తలుపులు మూయాలన్న అంశం పైన కూడా ఆగమ పండితులతో చర్చించి నిర్ణయం తీసుకుంటామని హామీ ఇచ్చారు. ఆధ్యాత్మికవేత్తల నుంచి ఆధ్యాత్మిస శక్తిని గ్రహించి నడుచుకుంటామని అన్నారు.

ఉదయం విష్ణు సహస్ర నామ స్త్రోత్ర పారాయణ మహాయజ్ఞం కార్యక్రమంలో కనుమూరి కూడా పాల్గొన్నారు. ఆయన సమక్షంలోనే స్వామి వారు టిటిడిపై విమర్శలు చేశారు. ఆ తర్వాత కనుమూరి స్వామి వారి వ్యాఖ్యలపై సానుకూలంగా స్పందించారు. ఇటీవలి కాలంలో టిటిడిపై చినజీయర్ తీవ్ర విమర్శలు చేస్తున్న విషయం తెలిసిందే. కాగా మహాయజ్ఞం తర్వాత చినజీయర్ స్వామి తిరుపతి నుండి తిరుమలకు పాదయాత్రను ప్రారంభించారు. తిరుమల పాదయాత్ర కాపాడాలని ఆయన ఈ పాదయాత్రను చేపట్టారు. ఈ యాత్రలో వందలాది మంది భక్తులు పాల్గొన్నారు. తిరుమల తిరుపతి పరిరక్షణ సమితి నేతలు స్వామీజి తీరుపై మండిపడ్డారు. ఈ విషయంలో ఆయనకు వినతి పత్రం ఇచ్చేందుకు వెళ్లారు. వారిని పోలీసులు అడ్డుకొని అరెస్టు చేశారు.

Published On February 3, 2012