ప్రధాని పదవి తిరస్కరించా, విజయమ్మ ముందే..: బాబు

By Srinivas

Published: Monday, February 6, 2012, 11:51 [IST]

నెల్లూరు: తాను రెండు సార్లు ప్రధానమంత్రి పదవిని తిరస్కరించానని తెలుగుదేశం పార్టీ అధినేత నారా చంద్రబాబు నాయుడు సోమవారం శ్రీ పొట్టి శ్రీరాములు నెల్లూరు జిల్లాలో అన్నారు. ఎస్పీఎస్ నెల్లూరు జిల్లాలో చంద్రబాబు రైతు పోరు బాట ప్రారంభం కానుంది. ఈ సందర్భంగా ఆయన మీడియాతో మాట్లాడారు. తాను ప్రధాని పదవిని ఎప్పుడూ ఆశించలేదన్నారు. రెండుసార్లు ఆ అవకాశం వచ్చినా తిరస్కరించానని అన్నారు. రాష్ట్ర ప్రయోజనాలే తనకు ముఖ్యమన్నారు. వామపక్షాలతో పొత్తుకు తమకు ఎలాంటి అభ్యంతరం లేదని ఆయన చెప్పారు. కుళ్లి పోయిన కాంగ్రెసు పార్టీతో కుమ్మక్కు కావాల్సిన అవసరం టిడిపికి ఎంత మాత్రం లేదన్నారు. 2జి కుంభకోణం పాపం పూర్తిగా కాంగ్రెసుదేనన్నారు. ఐఏఎస్ అధికారులు రోడ్డెక్కడంతో రాష్ట్రం పరువు బజారులో పడిందన్నారు. దివంగత ముఖ్యమంత్రి వైయస్ రాజశేఖర రెడ్డి హయాంలో ఎవరి వాటాలు వారికి అందేవని ఆరోపించారు.

ఒక కుటుంబం కోసం రాష్ట్రంలో పెద్ద ఎత్తున అవినీతి జరిగిందని ఆయన దుయ్యబట్టారు. అడవి పందుల్లా రాష్ట్రాన్ని దోచుకున్నారన్నారు. తెలుగు వారి పరువు పోయిందన్నారు. వైయస్సార్ కాంగ్రెసు పార్టీ గౌరవ అధ్యక్షురాలు వైయస్ విజయమ్మ ముందే మందలించి ఉండే బాగుండేదన్నారు. వారు ఎదురు దాడి మానుకోవాలని సూచించారు. అందరూ ఇష్టానుసారంగా చేయడం వల్లే ఇప్పుడు ఈ పరిస్థితి వచ్చిందన్నారు. రాష్ట్రాన్ని సర్వనాశనం చేశారన్నారు.

Published On February 6, 2012