కోర్టులో చిరువర్గం మంత్రి రామచంద్రయ్యకు చుక్కెదురు

By Srinivas

Published: Thursday, February 9, 2012, 9:28 [IST]

కడప: దేవాదాయ శాఖ మంత్రి సి.రామచంద్రయ్యకు బుధవారం కడప జిల్లా రాజంపేట కోర్టులో చుక్కెదురయింది. ఆయనపై విచారణలో ఉన్న కేసును ఉపసంహరించుకుంటూ రాష్ట్ర ప్రభుత్వం విడుదల చేసిన జివోను స్థానిక ఫస్ట్ క్లాస్ జ్యూడిషియల్ కోర్టు తోసిపుచ్చింది. కడపలో ఓ పోలీసు అధికారిని దూషించిన కేసులో సి.రామచంద్రయ్యపై కేసును ఉపసంహరించుకుంటూ ఇటీవల ప్రభుత్వం జివో జారీ చేసింది. ఈ జివోను కోర్టు రద్దు చేసి కేసును ఈ నెల 28కి వాయిదా వేసింది. కాగా ఈ కేసులో విచారణ నిమిత్తం సి.రామచంద్రయ్య నాలుగు రోజుల క్రితం రాజంపేట కోర్టుకు హాజరైన విషయం తెలిసిందే. రామచంద్రయ్య తెలుగుదేశం పార్టీలో ఉన్న సమయంలో 2006లో రోడ్డు విస్తరణ పనుల్లో భాగంగా జెసిబితో అక్రమణలు తొలగిస్తుండగా ఓ భవనం కూలిపోయంది. ఈ ఘటనలో పది మంది మృతి చెందారు. ఈ ఘోర ప్రమాదానికి అధికారులు, పోలీసుల నిర్లక్ష్యమే కారణమంటూ అప్పట్లో రాజ్యసభ సభ్యుడిగా ఉన్న రామచంద్రయ్యతో పాటు మరో ఇరవై మంది అప్పటి ఏఎస్పీ లక్ష్మీరెడ్డిని దూషించారు.

ప్రభుత్వాధికారిని దూషించారని, విధులకు ఆటంకం కలిగించారని రామచంద్రయ్యతో సహా ఇరవయ్యొక్క మందిపై కేసు నమోదైంది. అప్పటి నుండి దీనిపై విచారణ జరుగుతోంది. ఈ కేసును ఉపసంహరిస్తూ ఈ జనవరి 13వ తేదిన ప్రభుత్వం ఉత్తర్వులు జారీ చేసింది. అయితే విచారణ ఎదుర్కొంటున్న వారందరూ కోర్టుకు హాజరు కావాల్సిందేనని కోర్టు చెప్పింది. ఇటీవల రామచంద్రయ్య హాజరు కావాల్సి ఉన్నప్పటికీ గైర్హాజరయ్యారు. హాజరు కావాల్సిందేని కోర్టు చెప్పింది. దీంతో రామచంద్రయ్య ఈ రోజు కోర్టు ఎదుట హాజరయ్యారు.

Published On February 9, 2012