చంద్రబాబుపై వైయస్ చాలా కమిటీలు వేశారు: జెసి

By Pratap

Published: Friday, February 10, 2012, 9:25 [IST]

అనంతపురం: తెలుగుదేశం పార్టీ అధ్యక్షుడు నారా చంద్రబాబు నాయుడు ముఖ్యమంత్రిగా ఉన్న కాలంలోని పలు అంశాలపై దివంగత నేత వైయస్ రాజశేఖర రెడ్డి చాలా సభా సంఘాలు వేశారని కాంగ్రెసు సీనియర్ శాసనసభ్యుడు జెసి దివాకర్ రెడ్డి అన్నారు. అనంతపురం జిల్లా తాడిపత్రిలో ఆయన గురువారం మీడియా ప్రతినిధులతో మాట్లాడారు. అనేక విచారణలు జరిగాయని ఆయన చెప్పారు. ప్రస్తుతం జరుగుతున్న విచారణలను, ఇతర అంశాలను దృష్టిలో ఉంచుకుని సభా సంఘం వేశారని ఆయన అన్నారు. వైయస్ రాజశేఖర రెడ్డి ప్రభుత్వ హాయంలోని భూకేటాయింపులపై స్పీకర్ నాదెండ్ల మనోహర్ సభా సంఘం వేయడంపై ఆ విధంగా అన్నారు.

న్యాయ సలహాలు తీసుకుని అవసరమైతే ఆయా శాఖల మంత్రులను కూడా సీబీఐ విచారించవచ్చునని ఆయన అన్నారు. సీబీఐ కేవలం ఐఏఎస్‌లను టార్గెట్ చేస్తూ విచారణ జరుపుతోందే తప్ప సంబంధిత మంత్రుల గురించి పట్టించుకోలేదన్న ఆరోపణలపై ఈ విధంగా అన్నారు. వైయస్ హయాంలోని భూకేటాయింపులపై సభా సంఘం వేసినంత మాత్రాన టీడీపీ, కాంగ్రెస్‌లు కుమ్మక్కయ్యాయనడంలో అర్థం లేదన్నారు. ముఖ్యమంత్రి కిరణ్‌కుమార్‌రెడ్డిపైన, కాంగ్రెస్ ప్రభుత్వంపైన మంత్రి డీఎల్ చేసిన వ్యాఖ్యలపై స్పందించేందుకు ఆయన నిరాకరించారు. తనను అడిగేకంటే డిఎల్ రవీంద్రా రెడ్డినే అడిగితే సరైన సమాధానం వస్తుందని చతమ్కరించారు. డీఎల్ వ్యాఖ్యల వల్ల కాంగ్రెస్‌లో మరోసారి విభేదాలు భగ్గుమన్నాయన్న దానిపై జేసీ స్పందిస్తూ అలాంటిదేమీ ఉండదని కొట్టిపారేశారు.

Published On February 10, 2012