హరీష్‌ రావును అటెండర్‌గా కూడా పెట్టుకోరు: ఎర్రబెల్లి

By Srinivas

| Published: Tuesday, February 21, 2012, 11:15 [IST]

హైదరాబాద్: తెలంగాణ రాష్ట్ర సమితి సిద్దిపేట శాసనసభ్యుడు హరీష్ రావును అటెండర్‌గా కూడా పెట్టుకోమని తెలుగుదేశం పార్టీ సీనియర్ నాయకుడు ఎర్రబెల్లి దయాకర రావు మంగళవారం అన్నారు. టిఆర్ఎస్ అధ్యక్షుడు కల్వకుంట్ల చంద్రశేఖర రావు, ఆయన తనయుడు, సిరిసిల్ల శాసనసభ్యుడు కెటి రామా రావు, హరీష్ రావులు ఇకనైనా డ్రామాలు ఆపాలన్నారు. వారే అసలైన తెలంగాణ ద్రోహులన్నారు. నమ్మకద్రోహం చేసే హరీష్ వంటి వారిని అటెండర్‌గానూ ఎవరూ పెట్టుకోరన్నారు. 11ఏళ్లుగా తెలంగాణ కోసం అంటూ నాటకాలాడుతున్నారన్నారు. ఇప్పటికైనా వారు బుద్ధి తెచ్చుకోవాలన్నారు. తెలంగాణపై కెసిఆర్‌కు చిత్తశుద్ధి ఉంటే పార్టీలకతీతంగా అభ్యర్థులను ఉప ఎన్నికల్లో బరిలోకి దింపాలన్నారు. తెలంగాణ వచ్చే వరకు ఎన్నికలను బహిష్కరించాలని పిలుపునిచ్చారు. తమ సవాల్‌కు కెసిఆర్ సిద్ధమా అన్నారు. రాజీనామా చేసిన వారు స్వతంత్రంగా పోటీ చేస్తే గెలిపించేందుకు సిద్ధమన్నారు. కెసిఆర్ కాంగ్రెసుకు అమ్ముడు పోయారని ఆరోపించారు.

తెలంగాణ ప్రజలకు టిఆర్ఎస్ పైన నమ్మకం పోయిందన్నారు. తమ పార్టీ అధినేత నారా చంద్రబాబు నాయుడు గతంలోనే కేంద్ర మంత్రులు ప్రణబ్ ముఖర్జీకి, చిదంబరానికి లేఖ రాశారన్నారు. మళ్లీ రాయాల్సిన అవసరమేముందన్నారు. టిఆర్ఎస్ నిత్యం బాబు లేఖ ఇవ్వాలని విమర్శించడం తప్పితే ఏమీ చేయలేకపోతుందన్నారు. చిత్తశుద్ధి ఉండే ఎన్నికలను బహిష్కరించాలన్నారు. కెసిఆర్‌కు డబ్బు సంపాదన, రాజకీయ లబ్ధి తప్ప తెలంగాణ అవసరం లేదన్నారు. తెలంగాణపై చంద్రబాబు వ్యాఖ్యలకు కట్టుబడి ఉన్నామన్నారు. పోలవరం టెండర్ల కోసం కెసిఆర్ అమ్ముడుపోయారన్నారు. తెలంగాణ నగారా సమితి చైర్మన్ నాగం జనార్ధన్ రెడ్డి తమ మద్దతు కోరితే ఆలోచిస్తామన్నారు. నాగం రాజీనామా వెనుక తెలంగాణ ఆకాంక్ష ఉందా లేక జగన్ ఉన్నారా తెలియాల్సి ఉందన్నారు. సభ సజావుగా జరగకుండా స్పీకర్ పరోక్షంగా ప్రభుత్వానికి సహకరిస్తున్నారన్నారు.