శ్రీవారిని దర్శించుకున్న రోశయ్య, జెడి లక్ష్మీ నారాయణ

By Srinivas

Published: Saturday, February 25, 2012, 10:12 [IST]

తిరుపతి: తమిళనాడు గవర్నర్ కొణిజేటి రోశయ్య, సిబిఐ జాయింట్ డైరెక్టర్ లక్ష్మీ నారాయణ శుక్రవారం తిరుమలలో కలియుగ దైవం శ్రీ వెంకటేశ్వర స్వామిని దర్శించుకున్నారు. తిరుపతిలో ఓ కార్యక్రమంలో పాల్గొనడానికి రోశయ్య తిరుమలకు వచ్చారు. పద్మావతి అతిథి గృహాల వద్ద జెఇవో శ్రీనివాసరాజు, మహద్వారం వద్ద ఆలయాధికారులు, అర్చకులు ఆయనకు ఆహ్వానం పలికి స్వామివారి దర్శనం చేయించారు. ఆ తర్వాత ఆలయం ముందు గవర్నర్ రోశయ్య మీడియాతో మాట్లాడారు. కుటుంబ సమేతంగా స్వామివారిని దర్శించుకోవడం అదృష్టంగా భావిస్తున్నానన్నారు. అమీర్‌పేట భూవివాదం గురించి ఈ సందర్భంగా ఓ విలేకరి ప్రశ్నించగా, అవి కోర్టు వ్యవహారాలని, అలాంటి వాటి గురించి స్వామివారి సన్నిధిలో మాట్లాడనని చెప్పారు.

మరోవైపు వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి, ఓఎంసి, ఎమ్మార్ కేసులు దర్యాప్తు చేస్తున్న సిబిఐ జాయింట్ డైరెక్టర్ లక్ష్మీ నారాయణ కూడా తన పెళ్లి రోజు సందర్భంగా కుటుంబంతో కలసి తిరుమలకు వచ్చారు. వేకువజామున స్వామివారి అభిషేకసేవలో పాల్గొన్నారు. టిటిడి చైర్మన్ కనుమూరి బాపిరాజు, జెఇవో ఆయనకు వసతి, దర్శన ఏర్పాట్లు చూశారు. ఈ సందర్భంగా కేసుల దర్యాప్తు విషయమై విలేకరులు ప్రశ్నించగా, స్వామి సన్నిధిలో వాటి గురించి ప్రస్తావించరాదని అన్నారు. కాగా పలువురు ఇటలీ దేశస్థులు కూడా శ్రీవారిని దర్శించుకున్నారు.

Published On February 25, 2012