తిట్టుకున్నా ఓటేస్తారు, జగన్ పార్టీ పిలిచింది: హరీశ్వర్

By Srinivas

Published: Monday, February 27, 2012, 11:35 [IST]

హైదరాబాద్: తెలంగాణ ప్రజలు అభ్యర్థులను తిట్టుకున్నప్పటికీ తెలంగాణవాదానికే ఓటేస్తారని తెలుగుదేశం పార్టీ రెబల్ శాసనసభ్యుడు హరీశ్వర్ రెడ్డి సోమవారం అన్నారు. ప్రాంతీయతత్వం ముందు ఏ సెంటిమెంట్ పని చేయదని ఆయన చెప్పారు. మహబూబ్ నగర్ నియోజకవర్గంలోనూ తెలంగాణ రాష్ట్ర సమితి పార్టీ అభ్యర్థియే గెలుపొందుతారన్నారు. అయితే మెజార్టీ మాత్రం తక్కువగా వస్తుండవచ్చునని అన్నారు. ప్రజలు అభ్యర్థులను తిట్టుకున్నప్పటికీ తెలంగాణవాదానికే ఓటు వేస్తారన్నారు. తెలుగుదేశం పార్టీ అధినేత నారా చంద్రబాబు నాయుడు హోంమంత్రి చిదంబరానికి తెలంగాణకు అనుకూలంగా లేఖ ఇస్తే తాము నాగర్ కర్నూల్‌లో మర్రి జనార్ధన్ రెడ్డి కోసం ప్రచారం చేస్తామని చెప్పారు. తనను వైయస్సార్ కాంగ్రెసు పార్టీ ఆహ్వానించిందని ఆయన చెప్పారు. మెజార్టీ తగ్గినప్పటికీ ఉప ఎన్నికల్లో టిఆర్ఎస్సే గెలుస్తుందన్నారు.

చంద్రబాబు నాయుడు తెలంగాణ నేతలను ప్రలోభ పెడుతున్నారని తెలంగాణ రాష్ట్ర సమితి శాసనసభ్యుడు సోమారపు సత్యనారాయణ వేరుగా మహబూబ్ నగర్ జిల్లాలో అన్నారు. కాంగ్రెసు, టిడిపి రెండు పార్టీలో తెలంగాణకు మోసం చేశాయన్నారు. తెలంగాణ తెచ్చేది ఒక్క టిఆర్ఎస్సేనన్నారు. ఉప ఎన్నికల్లో తెలంగాణవాదాన్ని ప్రజలు గెలిపించాలని విజ్ఞప్తి చేశారు. బాబు తెలంగాణను మోసం చేయడం ఇది మొదటిసారి కాదన్నారు. ఆయనకు ఉన్నది ఒకటే కన్ను అని ఎద్దేవా చేశారు.

Published On February 27, 2012