జగన్ పార్టీలోకి వద్దని నా కూతురికి చెప్పా: నన్నపనేని

By Srinivas

Published: Monday, February 27, 2012, 12:06 [IST]

హైదరాబాద్: నా కూతురు కడప పార్లమెంటు సభ్యుడు వైయస్ జగన్మోహన్ రెడ్డి స్థాపించిన వైయస్సార్ కాంగ్రెసు పార్టీలోకి వెళ్లినంత మాత్రాన తాను ఆ పార్టీలోకే వెళుతున్నట్లు కాదని తెలుగుదేశం పార్టీ శాసనసభ్యురాలు నన్నపనేని రాజకుమారి సోమవారం స్పష్టం చేశారు. వైయస్సార్ కాంగ్రెసు పార్టీలోకి వెళ్లవద్దని తాను తన కూతురుకు ఎంత చెప్పినా వినలేదని ఆమె అన్నారు. రాజకీయాల్లో ఎవరి నిర్ణయాలు వారివేనని చెప్పారు. ఎవరి పైనా బలవంతంగా ఒత్తిడి చేయలేమని చెప్పారు. తన కూతురు జగన్ పార్టీలోకి వెళ్లినా తాను మాత్రం తెలుగుదేశం పార్టీలోనే కొనసాగుతానని స్పష్టం చేశారు. కాగా నన్నపనేని కూతురు సుధ వచ్చే సాధారణ ఎన్నికల్లో జగన్ పార్టీ తరఫున వినుకొండ స్థానం నుండి పోటీ చేసే అవకాశాలు ఉన్నాయని చెబుతున్నారు.

తెలుగుదేశం పార్టీ సీనియర్ నాయకురాలు, ఎమ్మెల్సీ నన్నపనేని రాజకుమారి కూతురు, అల్లుడు వైయస్ జగన్ నాయకత్వంలోని వైయస్సార్ కాంగ్రెస్ పార్టీలో శుక్రవారం చేరిన విషయం తెలిసిందే. గుంటూరు జిల్లా ఓదార్పు యాత్రలో ఉన్న జగన్ సమక్షంలో రాజకుమారి అల్లుడు ఎల్.లతీఫ్‌ రెడ్డి, కూతురు సుధ ఆ పార్టీలో చేరారు. శనివారం సాయంత్రం యాత్ర వినుకొండకు చేరుకున్నప్పుడు వారిద్దరు జగన్ వెంట దర్శనమిచ్చారు. వైఎస్సార్ కాంగ్రెస్ పార్టీ సభ్యత్వం తీసుకుంటున్నట్టు జగన్ సమక్షంలోనే ప్రకటించారు.

Published On February 27, 2012