శ్రీలక్ష్మితో కొండలరావుకు ఆర్థిక లావాదేవీల లింక్?

హైదరాబాద్: కాంగ్రెసు నాయకుడు వడ్డేపల్లి నర్సింగరావు మామ కొండలరావుకు, కర్ణాటక మాజీ మంత్రి గాలి జనార్దన్ రెడ్డి అక్రమ మైనింగ్ కేసులో అరెస్టయిన ఐఎఎస్ అధికారి శ్రీలక్ష్మికి మధ్య ఆర్థిక లావాదేవీలు ఉన్నట్లు సిబిఐ అధికారులు అనుమానిస్తున్నారు. దీంతో కొండలరావు నివాసంలో సిబిఐ అధికారులు శుక్రవారం సోదాలు నిర్వహించారు. వైయస్ రాజశేఖర రెడ్డి ప్రభుత్వ హయాంలో వడ్డేపల్లి నర్సింగరావు ఖనిజాభివృద్ధి సంస్థ చైర్మన్‌గా పనిచేశారు.

ఎమ్మార్ ప్రాపర్టీస్ కుంభకోణం కేసులో తనను సాక్షిగా చేర్చాలని స్ట్లైలిష్ హోమ్స్ డైరెక్టర్ తుమ్మల రంగారావు దాఖలు చేసుకున్న పిటిషన్‌పై సిబిఐ శుక్రవారం కౌంటర్ దాఖలు చేసింది. తుమ్మల రంగారావు పిటిషన్‌పై విచారణను సిబిఐ కోర్టు మార్చి 7వ తేదీకి వాయిదా వేసింది.

ఇదిలా వుంటే, వైయస్సార్ కాంగ్రెసు పార్టీ అధ్యక్షుడు వైయస్ జగన్ ఆస్తుల కేసులో స్టాంపులు, రిజిస్ట్రేషన్ల, సమాచార శాఖల అధికారులు శుక్రవారం సిబిఐ ముందు హాజరయ్యారు. వారిని గురువారం కూడా సిబిఐ అధికారులు విచారించారు.

English summary

It is said that IAS officer arrested in Gali Janardhan Reddy's illegal mining case ia having financial links with Kondal Rao.