భవానీపై ఊరుకోం: లగడపాటికి వల్లభనేని వంశీ సవాల్

విజయవాడ: కృష్ణా జిల్లా కాంగ్రెసు పార్టీ పార్లమెంటు సభ్యుడు లగడపాటి రాజగోపాల్ పైన తెలుగుదేశం పార్టీ జిల్లా పట్టణ అధ్యక్షుడు వల్లభనేని వంశీ శుక్రవారం తీవ్రస్థాయిలో మండిపడ్డారు. లగడపాటి నియంతలా వ్యవహరిస్తున్నారని విమర్శించారు. లగడపాటి స్థానిక సమస్యలు ఏమాత్రం పట్టించుకోవడం లేదన్నారు. భవానీ ద్వీపం టెండర్లు వెంటనే రద్దు చేయాలని ఆయన డిమాండ్ చేశారు. భవానీ ద్వీపం కాంట్రాక్టులో అక్రమాలు చోటు చేసుకున్నాయని ఆరోపించారు. భవానీ ద్వీపంలో స్టార్ హోటళ్లు నిర్మిస్తే నదీ జలాలు కలుషితం అవుతాయని అన్నారు. భవానీ ద్వీపాన్ని ప్రైవేటీకరిస్తే ఊరుకోమని అన్నారు. విజయవాడ పట్టణంలోని రైల్వే స్టేషన్‌లో ప్రతి ప్లాట్ ఫాంకు ఓ ఎస్కలేటర్ కట్టిస్తానని లగడపాటి గతంలో చెప్పారని, ఆ హామీ ఇంత వరకు నెరవేర్చలేదన్నారు.

ప్రతి ప్లాట్ ఫాం వద్ద ఎస్కలేటర్ ఎప్పుడు పెట్టిస్తారో చెప్పాలని డిమాండ్ చేశారు. ఇప్పటి వరకు విజయవాడ పట్టణానికి అధికార పార్టీ సభ్యుడిగా ఉండి ఒక్క రైలును తీసుకు రాలేక పోయారన్నారు. లగడపాటి రాజగోపాల్‌కు దమ్ముంటే విజయవాడ పట్టణ అభివృద్ధిపై బహిరంగ చర్చకు సిద్ధం కావాలని సవాల్ విసిరారు. బహిరంగ చర్చకు ఆయన సిద్ధం కాని పక్షంలో తాను చేసిన అభివృద్ధిని పుస్తక రూపంలో ప్రచురించాలని సూచించారు. లగడపాటి సమస్యలు పట్టించుకోవడం లేదనడానికి దుర్గ గుడి వద్ద పూర్తి కాని ఫ్లై ఓవరే నిదర్శనమని అంటున్నారని అన్నారు.

English summary

TDP leader Vallabhaneni Vamsi challenged MP Lagadapati Rajagopal about Vijayawada development.