కెకె కోసం కాంగ్రెసు తెలంగాణ ఎంపీల బ్యాటింగ్

న్యూఢిల్లీ: సీనియర్ నేత కె. కేశవరావుకు తిరిగి రాజ్యసభ సీటు ఇప్పించేందుకు కాంగ్రెసు తెలంగాణ పార్లమెంటు సభ్యులు బ్యాటింగ్ మొదలు పెట్టారు. కేశవరావు రాజ్యసభ పదవీ కాలం త్వరలో ముగుస్తోంది. తిరిగి కేశవరావును రాజ్యసభకు నామినేట్ చేయడానికి పార్టీ అధిష్టానం మీద ఒత్తిడి తెచ్చేందుకు వారు సిద్ధపడ్డారు. పార్లమెంటు సభ్యుడు మందా జగన్నాథం నివాసంలో కాంగ్రెసు తెలంగాణ పార్లమెంటు సభ్యులు ఏడుగురు సోమవారం సమావేశమై ఆ విషయంపై చర్చించారు. ఈ సమావేశంలో కేశవ రావుతో పాటు జి. వివేక్, పొన్నం ప్రభాకర్, సిరిసిల్ల రాజయ్య, గుత్తా సుఖేందర్ రెడ్డి, మధు యాష్కీ గౌడ్ పాల్గొన్నారు. సమావేశానంతరం మందా జగన్నాథం మీడియాతో మాట్లాడారు.

పార్టీ కోసమే కేశవరావు తెలంగాణవాదాన్ని బలంగా వినిపించారని వారు పార్టీ అధిష్టానానికి విన్నవించనున్నారు. పార్టీ అధ్యక్షురాలు సోనియా గాంధీతో పాటు కోర్ కమిటీ సభ్యులను, ముఖ్యమంత్రిని, పిసిసి అధ్యక్షుడిని కలిసి కేశవరావును తిరిగి రాజ్యసభకు నామినేట్ చేయాలని కోరుతామని వారు చెప్పారు. కేశవరావు పార్టీకి విధేయుడని, మేధావి అని, అందువల్ల రాజ్యసభలో కెకె ఉండాలని మందా జగన్నాథం అన్నారు. తమపై ఎంత ఒత్తిడి ఉన్నా, పార్టీ అధిష్టానాన్ని ఇబ్బంది పెట్టి తెలంగాణ ప్రజల మనోభావాలను వినిపించామని ఆయన చెప్పారు. తెలుగుదేశం అధ్యక్షుడు నారా చంద్రబాబునాయుడిది తెలంగాణపై రెండు కళ్ల సిద్ధాంతమని రాజయ్య అన్నారు.

English summary

Congress Telangana MPs have prepared to put pressure on party high command for re-nomination of K Keshav Rao to Rajyasabha.