రాజ్యసభ నుండి దాసరి, కెకె ఔట్? చిరంజీవి ఇన్

By Srinivas

Published: Friday, March 9, 2012, 9:18 [IST]

న్యూఢిల్లీ: తిరుపతి శాసనసభ్యుడు చిరంజీవి, కాంగ్రెస్ అధికార ప్రతినిధి రేణుకా చౌదరిలకు రాజ్యసభ సీట్లు దాదాపు ఖరారైనట్లు తెలుస్తోంది. పదవీ విరమణ చేస్తున్న దాసరి నారాయణరావు, రషీద్ అల్వీలకు మూడోసారి రాజ్యసభ ఇచ్చే అవకాశాలు లేవని, అదే సమయంలో కె.కేశవరావు, సంజీవరెడ్డికి కూడా రెండోసారి రాజ్యసభ సీటు నిరాకరిస్తారని పార్టీ వర్గాలు భావిస్తున్నాయి. చిరంజీవికి రాజ్యసభ సీటు ఖాయమని తేలడంతో దాసరి ఢిల్లీ వచ్చి అధిష్ఠానాన్ని కలుసుకునే ఆలోచన మానుకున్నారని, ఆయనకు ఇతర పార్టీల నుంచి పిలుపు వచ్చే అవకాశాలున్నాయని తెలుస్తోంది. తెలంగాణ విషయంలో అధిష్ఠానాన్ని ధిక్కరించిన కేకే స్వయంకృతాపరాధంతోనే సీటు పోగొట్టుకున్నారని, చిరంజీవికి స్థానం ఇచ్చిన తర్వాత అదే సామాజిక వర్గానికి చెందిన మరో నేతకు ఇవ్వడం కష్టమని కాంగ్రెస్ నేతలు అంటున్నారని తెలుస్తోంది. ఈ నెలాఖరులోగా రాజ్యసభకు కొత్త అభ్యర్థులను ఎన్నుకునేందుకు ఎన్నికల కమిషన్ షెడ్యూలు ప్రకటించిన విషయం తెలిసిందే.

పిసిసి చీఫ్ బొత్స సత్యనారాయణ ఢిల్లీ వచ్చి పార్టీ రాష్ట్ర వ్యవహారాల ఇన్ చార్జి గులాంనబీ ఆజాద్‌ను కలుసుకోవడంతో రాజ్యసభ అభ్యర్థుల ఎంపికపై చర్చ జరిగిందన్న ఊహాగానాలు బయల్దేరాయి. మార్చి 12 తర్వాతే ఈ విషయంపై అధికారికంగా చర్చలు జరుగుతాయని, బుధవారం ఆజాద్ పుట్టినరోజు కావడంతో గురువారం వచ్చి అభినందనలు తెలిపానని బొత్స చెప్పారు. రేణుకా చౌదరి, చిరంజీవితో పాటు రెడ్డి సామాజికవర్గానికి చెందిన ఒక నేతకు రాజ్యసభ అవకాశం లభించవచ్చునని రాజకీయవర్గాలు అంటున్నాయి. మాజీ స్పీకర్ సురేశ్‌ రెడ్డి, ముఖ్యమంత్రికి న్యాయసలహాదారుగా ఉన్న వరంగల్ మాజీ ఎంపీ సురేందర్‌ రెడ్డి కుమారుడు రఘు రెడ్డి, పెన్నా ప్రతాప్‌ రెడ్డిలతో పాటు దివంగత వైయస్ఆర్ సోదరుడు వైయస్ వివేకానంద రెడ్డి కూడా రంగంలో ఉన్నారు. సోనియాను ఇప్పటికే కలుసుకున్న వివేకానంద రెడ్డి మూడు రోజులుగా ఢిల్లీలోనే మకాం వేసి ఆజాద్‌ను, ఇతర నేతలను కలుసుకున్నారు.

Published On March 9, 2012