తెరాసను మూసేస్తే కెసిఆర్ షరతులకు సరే: మోత్కుపల్లి

By Pratap

Published: Saturday, March 10, 2012, 13:08 [IST]

హైదరాబాద్: పార్టీని మూసేస్తే తాము తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు షరతులకు అంగీకరిస్తామని తెలుగుదేశం తెలంగాణ ప్రాంత శానససభ్యుడు మోత్కుపల్లి నర్సింహులు అన్నారు. తెలంగాణ రాజకీయ జెఎసి చైర్మన్ కోదండరామ్ కథను తాము త్వరలో బయటపెడతామని ఆయన అన్నారు. కెసిఆర్‌కు వ్యతిరేకంగా రూపొందించిన పాటల సీడీని ఆయన శనివారం ఆవిష్కరించారు. ఈ సందర్భంగా ఆయన మీడియా ప్రతినిధులతో మాట్లాడారు. కెసిఆర్‌పై, కోదండరామ్‌పై ఆయన తీవ్రంగా ధ్వజమెత్తారు.

ఎవరు పైసలిస్తే వారి వద్దకు వెళ్లే రాజకీయ వ్యభిచారి కెసిఆర్ అని ఆయన వ్యాఖ్యానించారు. కోదండరామ్‌కు బుద్ధుందా అని ఆయన అడిగారు. మహబూబ్‌నగర్‌లో ఎవరికి మద్దతిస్తారో కోదండరామ్ చెప్పకపోవడాన్ని ఆయన తప్పు పట్టారు. ప్రస్తుత పరిస్థితికి కోదండరామే కారణమని ఆయన అన్నారు. చెన్నారెడ్డి కన్నా మించిన మోసగాడు కెసిఆర్ అని ఆయన వ్యాఖ్యానించారు. అడ్డా మీద కూలీ మాదిరిగా కెసిఆర్ వ్యవహరిస్తున్నారని ఆయన అన్నారు. ఎన్ని డబ్బులు తీసుకుని కెసిఆర్ తమ పార్టీ అధ్యక్షుడు నారా చంద్రబాబు నాయుడి తిడుతున్నారో చెప్పాలని ఆయన డిమాండ్ చేశారు. కెసిఆర్ మోసం చేసిన తీరున పాటల ద్వారా ప్రచారం చేస్తామని ఆయన చెప్పారు.

Published On March 10, 2012