మంత్రుల ఇష్యూ, టిడిపితో గొంతు కలిపిన జగన్ పార్టీ

By Pratap

Published: Monday, March 12, 2012, 16:28 [IST]

హైదరాబాద్: వైయస్ జగన్ ఆస్తుల కేసులో సుప్రీంకోర్టు ఆరుగురు మంత్రులకు నోటీసులు జారీ చేయడంపై తెలుగుదేశం, వైయస్సార్ కాంగ్రెసు పార్టీల నాయకులు ఒకే గొంత వినిపిస్తున్నారు. నోటీసులు అందుకున్న మంత్రులు రాజీనామా చేయాల్సిందేనని వారు డిమాండ్ చేస్తున్నారు. మంత్రులు రాజీనామా చేయాలని డిమాండ్ చేస్తూ తెలుగుదేశం శాసనసభ్యులు సోమవారం శాసనసభా కార్యక్రమాలను స్తంభింపజేశారు. మంత్రులు రాజీనామా చేసే వరకు తాము పోరాటం చేస్తామని వారు చెప్పారు. ఆరుగురు మంత్రులపై తీవ్రమైన ఆరోపణలు వచ్చినా ముఖ్యమంత్రి ఎందుకు స్పందించడం లేదని వారు అడిగారు. మంత్రులు రాజీనామా చేయాల్సిందేనని వారన్నారు. తెలుగుదేశం శానససభ్యులు అశోక గజపతి రాజు, గాలి ముద్దు కృష్ణమ నాయుడు, దేవినేని ఉమా మహేశ్వర రావు, పయ్యావుల కేశవ్, కెఇ కృష్ణమూర్తి తదితరులు ప్రభుత్వంపై తీవ్రంగా ధ్వజమెత్తారు. రాజీనామా చేయకపోతే మంత్రులను డిస్మిస్ చేయాలని వారు డిమాండ్ చేశారు.

వైయస్సార్ కాంగ్రెసు పార్టీ నాయకులు కూడా మంత్రులపై తీవ్రంగా ధ్వజమెత్తారు. ఆరుగురు మంత్రులను బర్తరఫ్ చేయాలని వైయస్సార్ కాంగ్రెసు పార్టీ నాయకురాలు కొండా సురేఖ డిమాండ్ చేశారు. మంత్రి వర్గం నుంచి తొలగించిన తర్వాతనే వారిని విచారించాలని ఆమె అన్నారు. ఐఎఎస్ అధికారుల విషయంలో కూడా ఇదే విధానాన్ని పాటించాలని ఆమె డిమాండ్ చేశారు. సుప్రీంకోర్టు ఆరుగురు మంత్రులకు నోటీసులు జారీ చేయడం సిబిఐకి చెంపపెట్టు అని వైయస్సార్ కాంగ్రెసు పార్టీ అధికార ప్రతినిధి వాసిరెడ్డి పద్మ అన్నారు.

జగన్ ఆస్తుల కేసులో ఆరుగురు మంత్రులకు నోటీసులు ఇచ్చినా కిరణ్ కుమార్ రెడ్డి ప్రభుత్వం స్పందించడం లేదని వైయస్సార్ కాంగ్రెసు నేత అంబటి రాంబాబు విమర్శించారు. ఈ ప్రభుత్వం తీరు దున్నపోతు మీద వర్షం కురిసినట్లుగా ఉందన్నారు. దివంగత ముఖ్యమంత్రి వైయస్ రాజశేఖర రెడ్డి హయాంలో 26 జివోలు జారీ చేసిన వారిని వదిలేసి కేవలం జగన్ పైనే సిబిఐ దర్యాఫ్తు చేయడం సరికాదని ఆ పార్టీ సలహాదారు సోమయాజులు అన్నారు. మంత్రులను వదిలేసి జగన్‌ను టార్గెట్ చేయడం సిబిఐ బరితెగింపుకు నిదర్శనం అన్నారు. మంత్రులను, అధికారులను సిబిఐ ఎందుకు విచారించడం లేదని ఆయన ప్రశ్నించారు. వైయస్ జగన్ వర్గానికి చెందిన జూపూడి ప్రభాకర రావు కూడా ప్రభుత్వంపై తీవ్రంగా ధ్వజమెత్తారు.

Published On March 12, 2012